Brugsenip saavani sumiiffinnilu tamanit orninneqarsinnaasuni nerisassanik tuniniaaneq

Nuummi Brugsenip saavani nerisassanik tuniniaaneq ukiuni arlalinni uteqqiattumik ajornartorsiutaasimavoq. Tusagassiuutitigut eqqartorneqarneranut atatillugu sumiiffinni tamanit orninneqarsinnaasuni inuussutissanik tuniniaanermut tunngatillugu pissutsit UNIO-p matumuuna erseqqissarusuppai.

Pisanik nutaanik toqqaannartumik pisisartunut tuniniaanissaq inuussutissarsiutigalugu piniartunut aalisartunullu atuuppoq. Tamanna ilaatigut piniartup pisani pisisartup najugaanukaanneratigut imaluunniit pisisartup pisaq aalisartup angallataanut kalaalimineerniarfimmulluunniit aaneratigut pisinnaavoq.

Suliffeqarfiit inuussutissaleriffiusut pillugit Namminersornerullutik Oqartussat nalunaarutaanni nr. 21, 27. juli 1998-imeersumi § 26-mi allassimavoq, kalaalimineerniarfinni tuniniaanermut tunngatillugu kommuni najukkami oqartussaasuusoq. Taamaalilluni kommuni kalaalimineerniarfiup pilersinnissaanut, eqqiluitsuutinnissaanut aserfallatsaalinissaanullu akisussaaffeqarpoq. Kalaalimineerniarfiup aaqqissuussaaneranut atortorissaarutaanullu tunngatillugu paragraffimi tulliuttut piumasaqaatigineqarput:
  • Inuussutissanut ilitsivigineqartartut qaavi asakkuminartuunissaat qulakkeerniarlugu pitsaasuussapput kiisalu quppaqarnatillu qulloorneqassanngillat. Taamatuttaarlu atortut taakkua toqunartortaqassanngillat.
  • Imermik imerneqarsinnaasumik naammattumik pilersorneqassaaq.
  • Assannut asaffiusinnaasunik atortorissaarusersuisoqassaaq.
  • Eqqagassat eqqiluisaarnissamut akornutaanngitsumik katersorneqarsinnaassallutillu piiarneqarsinnaassapput.
  • Inuussutissat mingutsinneqarsinnaajunnaarlugit inissinneqartassapput. Inuussutissat aamma nunap qaanit pukkinnerpaamik 80 cm-tut portutigisumut inissinneqartassapput.
Inuussutissat nutaat allanngortinneqanngitsullu taamaallaat kalaalimineerniarfimmi tunisaaqqusaammata aamma ilisimatitsissutigineqassaaq.

Frank Rasmussenip Kommuneqarfik Sermersuumeersup KNR-imit ullormi 21. marts 2018-imi apersorneqarnerani erseqqissaassutigisaatut, inuussutissanik pisuinnaat aqqutaani tuniniaanerit tamarmik inerteqqutaanngillat.
Assersuutigalugu inuussutissaleriffiusutut akuersissummik tunineqaqqaarani aaqqissuussani assigiinngitsuni tuniniaavilerluni tuniniaaneq inerteqqutaanngilaq. Food Festivali ukiuni kingullerni marlussunni ukiakkut Nuummi ingerlanneqartarsimasoq assersuutigineqarsinnaavoq. Suliffeqarfiup aaqqissuussanut taama ittunut peqataarusuttup annertussusaa apeqqutaatillugu akuerineqartarpoq. Piumasaqaatit tulliuttut naammassigaanni aallaavittut suliffeqarfiutigisaq akuerineqassanngilaq:

  • Ukiumut aaqqissuussani qulinit ikinnerusunik tuniniaasimagaanni.
  • Tuniniaanerit tamarmik sivisussusaat ullut 30-t sinnersimanngippagit.
Tuniniaaviit kalaalimineerniarfiup aaqqissungaaneratigut atortorissaarutaatigullu assigissavaat.

Inunnut inuussutissalerisartunut Inuussutissanik nersutillu nappaataannik inunnut tunillaassorsinnaasunik nakkutilliineq pillugu Inatsisartut peqqussutaat nr. 17, 28. oktober 1993-imeersoq kiisalu Suliffeqarfiit inuussutissaleriffiusut pillugit Namminersornerullutik Oqartussat nalunaarutaat nr. 21, 27. juli 1998-imeersoq, nunatsinni inuussutissanik tunisassiornermut tuniniaanermullu tunngatillugu tunngavissiinermik aalajangersaaqataasut UNIO-p innersuussutigissavai.

Pisisartup taamatuttaarlu nunami inuit peqqissusaannik qulakkeerinninnissaq inatsimmi siunertarineqarpoq. Tamanna ilaatigut nalunaarummi nr. 21, 1998-imeersumi § 17-imi oqaatigineqarpoq, tassani allassimavoq, tuniniaasup inuussutissat tuniniakkani peqqissutsimut ajoqusiinnginnissaat arlaatigulluunniit inunnit nerineqarnissaannut naleqquttuunissaat naggaterpiaani akisussaaffigaa. Inuussutissap kalaalimineerniarfimmit, suliffeqarfinni inuussutissaleriffiusunit akuerisani, aaqqissuussinerni nerisassanik saqqummersitsiffiusunit imaluunniit piniartup/aalisartup atuisullu akornani tuniniarneqarnera apeqqutaatinnagu.

Apeqqutissaqartoqartillugu Kalaallit Nunaanni Uumasunut Nakorsaqarnermut Inuussutissalerinermullu Oqartussanut uumasut@nanoq.gl-imut imaluunniit 34 50 00-imut ammasarfiata iluani, tassa ataasinngorneq, marlunngorneq, sisamanngorneq tallimanngornerlu nal. 9.00-imiik 15.00-ip tungaanut saaffiginnittoqarsinnaavoq.