Kikkut tamarmik pappiaqqanik taasiveqarnissaat qulakkeerneqarpoq

Marlunngornermi 24. april 2018-imi Inatsisartunut qinersisoqarnissaa sioqqullugu pappiaqqat taasivissat Kalaallit Nunaanni taasiartorfinnut tamanut apuunneqarput

”Maanna aaqqissuunneqareerpoq, Air Greenland sikup sinaanukaassissasoq. Tassani naapissavaat qimussit, nassiussamik Savissivimmut ingerlatitseqqittussat”. Taama tallimanngornermi ualikkut TELE-POST Nunami Namminermi Immikkoortortamut Namminersorlutik Oqartussanut mailerpoq. Arfininngornermi  Pituffimmi Air Greenlandip stationslederiat Peter Lillie biilerluni 35 km amerikarmiut campiat atorunnaarnikoq Camp Tuto ornippaa. Tassani nal. 18:30 pilersaarut malillugu naapippaa Savisissivimmioq piniartoq Markus Hansen. Markus pappiaqqat taasivissat qimussiminut useriarlugit ingerlaannartumillu 150 km. sermersuakkoorullugit Savissivimmut uterpoq.

Air Greenlandip aamma nunami najugaqarfiit avinngarusimanerpaasa ilaanni najugaqartut ikioqatigiinneq imaannaanngilluinnartoq pinerisigut  aatsaat qulakkeerneqarsinnaasimavoq, pappiaqqat taasivissat taasiartorfimmut tassunga piffissaq eqqorlugu apuunnissaat.

Pappiaqqat taasivissat 43.000-it

Timmisartut, qulimiguullit, umiarsuit, umiatsiaq sukkasuuliaq, biilit, qamuteralaat qimussillu ulluni 14-it kingulliit sulisimapput, marlunngornermi apriilip 24-ani qinersisoqannginnerani pappiaqqat taasivissat 43.000-it nunami sumiiffinnut tamanut apuunnissaat qulakkeerniarlugit.

Nassiussat tamarmik apuunnissaannut TELE-POST akisussaaffeqarpoq. Poortukkat Nuummit 9. april ’Jetpost’-itut nassiunneqarput, taasiartorfinnulli 71-inut poortukkat 87-it nassiunneqarnerini ’jet’ kisimi atorneqanngingajappoq.

- Qinersinermi atugassat nassiussornissaanut TELE-POST-ip akisussaaffia logistikkimi inuiaqatigiinnullu tunngasutigut suliassatta pingaarnerpaat ilagaat. Akisussaaffik tamanna ilisimalluinnarparput, taamaattumillu nassiussassat taakku suli iliuuseqarusunnerulersittarpaatigut, taama oqarpoq centerip pisortaa Susanne Kristensen, taassuma nassiussalerinermi aqutsisoq Aviaja Holm peqatigalugu qinersinermi atortussat piffissaq eqqorlugu apuunnissaat akisussaaffigaa.

Isumaliupallannissaq pisariaqarpoq

Akisussaaffik malugineqarluarsimavoq. Nassiussinerit tamarmik elektroniskimik malinnaavigineqarsimapput. Qaanaap tungaanut nassiussat Ilulissani unittoormata, Aviaja Holm aalajangipallappoq. Nassiussat Savissivimmut taamaallaat piffissaq eqqorlugu anngussinnaapput, nassiussat Pituffimmut nassiunneqartussanngorpata. Nalunaarut Ilulissani allakkerivimmut nassiunneqarpoq. Periataallaqqinnerup tamatuma taamaallaat periarfissaalersippaa, TELE-POST-ip tallimanngorneq ualikkut Savissivimmut nassiussat apuunnissaat qulakkeerneqarnerat.

Aamma Kujataani unammillernartoqarsimavoq. Silap ajornera pissutigalugu. Tamanna isumaqarpoq, sapaatip akunnerani Qaqortumut Arsummullu qulimiguulimmik timminissaq pingasunngornermi apriilip 18-ianni unitsinneqartariaqarsimaneranik. Taarsiullugu nassiussat Royal Arctic Linep sumiiffimmi umiarsuaanut pajuttaammukaanneqarput, sapaammilu apriilip 22-ani pappiaqqat taasivissat Arsummut aqqusaarunneqarlutik. Nunami najugaqarfiit kujasinnerpaartaannut Nanortaliup eqqaanut nassiussat piffissaq eqqorlugu apuunnissaat qulakkeerniarlugu TELE-POST ilaatigut umiatsiamik sukkasuuliamik attartortariaqarsimavoq ilaatigut TELE attartoriigaanut immikkuullaarissumik iliortoqarpoq timmisartuussinermi pappilissat taasivissat Alluitsup Paanut nassarneqarmata

Qeqertat: qinersisartut 18-it

Inatsisartunut qinersinermi taasiartorfiit 72-iupput. Nuummi taasiartorfik 12.941-nik taasisinnaatitaasunik inoqarluni taasiartorfik annerpaavoq. Nuup Timersortarfia Nuummi taasinermut initaliivoq. Tassani taasisinnaatitaasut tamarmik 31 %-ii taasinissaminnut periarfissaqarput. Qinersisartut sinneri 69 %-it taasiartorfinni 71-ini sinnerini siaruaassimapput. Tassani Qaanaap eqqaani Qeqertani, Qeqertarsuup eqqaani Kangerlummi kiisalu Qaqortup eqqaani Qassimiuni 18-inik, 20-nik aamma 20-nik taasisinnaasoqarlutik taasiartorfiupput minnerpaat.

Partiit arfineq-marluk qinigassanngortittullu 232-t

Qinersinissamut partiit sassarsinnaatitaasut arfineq-marluk siullermeertumik akuerineqarput, Inatsisartunilu issiavinnut 31-usunut katillugit 232-t qinigassanngortipput. Nunamut Namminermut Immikkoortortaq Qinersinermut Ataatsimiititaliamut allattoqarfiuvoq, taamaasillunilu qinersinerup suliarineqarnerata naammassinissaanut akisussaasuulluni. Suliffeqarfik IT-lerisoq Kimik iT peqatigalugu Nunamut Namminermut Immikkoortortap suliaraa, kikkut tamarmik taasinernik naatsorsuineq pissanganartoq qinersineq.gl-ikkut (valg.gl) malinnaaffigisinnaassagaat. Taasinerit naatsorsorneri kommunini naqiterneqarnerini ingerlaannaq nittartakkami takutinneqartarput. Qinersinermut Ataatsimiititaliap taasiviit ataasiakkaat naatsorsuineri akuerigaagagit, naatsorsuinermi inernerit qorsorpaluttunngortarput. Taasivinnit 72-iusunit tamanit inernerit qorsorpaluttunngorpata, nuna tamakkerlugu inernerugallartoq ataatsimut pigineqalissaaq. Nunamut Namminermut Immikkoortortap ilisimatitsissutigaa, takorlooreerneqarsinnaanngitsoq, inernerugallartut marlunngornermi unnuap qeqqannginnerani imaluunniit unnuap qeqqareernerani pingasunngorninngortoq pigineqalissanersut.

Sukumiinerusumik paasisaqarusuttut attavigisinnaavaat Nunamut namminermut immikkoortortaqarfimmi pisortaq Klaus Georg Hansen – Mobil: 54 73 46 – Email: kgh1@nanoq.gl.

 

Savissimmut pappiaqqat taasivissat Peter Lillie, Air Greenland,  amerikarmiut campiat atorunnaarnikoq Camp Tuto-mi, 35 kilometeriusumi sermersuup killingani piniartumut Markus Hansenimut tunniunneqarput. Tassanngaanniit Markus sermersuakkut 150 kilometerit qimussiullugit Savissimmut apuupai.

(Assiliisoq: Kjell Selleskog)