Kofoeds Skole-mi katsorsartinnissamut namminneq innersuussisinnaapput

Ilinniartuutivut pinngitsuuisinnaajunnaarnermut katsorsartikkusuppata, katsorsartinnissaat ingerlaannaq aallartissinnaavoq. Ajornartoqassagaluarpat imaluunniit akissutissamik utaqqisoqassagaluarpat katsorsartinnissamut kajumissusaat peerussimasinnaassarpoq, qinnuteqaatip suliarineqarnerani. Taamaammat Allorfik saaffigisimavarput. Taakkualu saaffiginninnerput tigulluarpaat”, Kofoed Skole Nuuk-p pisortaa Gujo Thorsteinsson oqarpoq.

Sunaaffa Allorfiup suliffeqarfiit nammineq innersuussisinnaanerat periarfissaqartikkai, kommunimi sullissisut avaqqullugit. Tamanna suleqatigiinnermik isumaqatigiissut aqqutigalugu pilersinneqarpoq, suliffeqarfiullu pisussaaffinnik akisussaaffimmik tigusineratigut, tassa katsorsartereernerup kingorna malitseqartitsillutik ilinniartorlu katsorsartinnermini qanoq iluaqutigisimaneranik Allorfimmut paasissutissanik nalunaarsuinissaannut ikiuillutik.

Nuannaarutigaarput Kofoed Skole suleqatigissallugu. Neriuppugut tamanna ullorsiornerminni pinnattaarallugulusooq nuannarisimassagaat. Suliffeqarfik siulliuvoq taama suleqatigiinnissamut isumaqatigiissusiornitsinnut uatsinnullumi aamma pingaaruteqarpoq.” Allorfimmi ingerlatsisoq Birgit Niclasen oqarpoq, nangillunilu: “Kissaatigaarput suliffeqarfiit allat tamanna aamma malissinaagaat. Tamannami ajornanngilaq. Saaffigiinnasavatsigut.”

Kofoeds Skole-lu suleqatigiinnermi sulisut namminneq qinnuteqaatit qarasaasiakkut immersorsinnaavaat, Allorfiullu tiguneqarpata misissorlugillu katsorsaavinnut innersuussavai. Ilinniartoq allanik ajornartorsiuteqaruni kommunimi sullissisoq saaffigineqarsinnaavoq katsorsartinneq aallartereeraluartoq, tamannali kisimi pisinnaavoq ilinniartup kissaatigippagu.

Attavigisassaq: Nakorsaq DrPH Birgit Niclasen, Allorfimmi ingerlatsisoq. Mail: bivn@allorfik.gl, tlf. 523832 imaluunniit Gojo Thorsteinsson, Kofoeds Skole Nuuk-mi ingerlatsisoq, tlf. 580226.