Kalaalimineerniarfiit akuerisaasussaapput

Nuummi Brugsenip eqqaani kalaaliminernik tuniniaaneq allanilu tuniniaavittut akuerisaanngitsuni inerteqqutaalluinnarpoq

Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup aamma Kalaallit Nunaanni Aalisarsinnaanermut Akuersissutinik Nakkutilliisoqarfiup Nuummi Brugsenip eqqaani kalaaliminernik piffissami sivitsortumi tuniniaasoqartartoq ilisimavaat.

Oqartussaasut allanut atasumik tuniniaavinni akuerisaanngitsuni tuniniaasoqartarnera aamma ilisimavaat.
Pisortaqarfiit pineqartut matumuuna erseqqissaatigerusuppaat kalaaliminernik tuniniaaneq suliffeqarfiit inuussutissaleriffiusut pillugit Namminersornerullutik Oqartussat nalunaarutaat naapertorlugu inerteqqutaalluinnarmat.
Nalunaarut naapertorlugu kommunalbestyrelsip sumiiffik inuussutissanik tuniniaavissatut innersuussutaa taamaallaat tuniniaavigineqarsinnaavoq. 
Atuisartup kialluunniit assilisami takusinnaavaa kommunalbestyrelsip tuniniaavittut innersuussutiginngisaani kalaaliminernik tuniniaasoqartoq.
 
Assilisami aamma takuneqarsinnaavoq kalaaliminernik tuniniaasoqartoq biilip milluaassutaa eqqakkat aqqutaata sulluliaanit mingoqisumik peqqinnanngilluinnartumik milluaaleruttortoq.

Tuniniaavigineqartullu eqqannguani biilit pujuliortitsisut takuneqarsinnaapput, inunnik
pujortartoqarluni aamma qimmit pitussimaneqanngitsut takuneqarsinnaallutik. Sumiiffik  inuussutissanik tuniniaavigineqartussatut naleqqutinngivilluni.

Tamanna aamma suliffeqarfiit inuussutissaleriffiusut pillugit Namminersornerullutik Oqartussat nalunaarutaannut unioqqutitsisuuvoq, inuussutissat mingutsinneqarsinnaajunnaarlugit inissinneqartussaammata, nunap qaanit pukkinnerpaamik 80 centimeteritut portutigisumut inissinneqartussaallutik.

Naalunaarummi ilaatigut aalajangersaasoqarpoq kalaalimineerniarfik pilersinneqassasoq eqqiluitsuutinneqarluni, aserfallatsaalineqarluni inuussutissat mingutsinneqannginnissaat siunertaralugu.

Aamma erseqqissaassutigineqarpoq inuussutissanut ilitsivigineqartartut qaavi pitsaasuussasut, manissuullutik, asanneqarsinnaallutik atortussanillu toqunartoqanngitsunit sanaajullutik.

- Assuarnarluinnarpoq Kommuneqarfik Sermersooq inuussutissanik tuniniaasunut piffissami sivitsortumi ilisimatitsisimanngimmat Brugsenip eqqaani inuussutissanik tuniniaaneq inerteqqutaalluinnarmat, aammali kommunini allani. Tamannami suliffeqarfiit inuussutissaleriffiusut pillugit Namminersornerullutik Oqartussat nalunaarutaannut unioqqutitsineruvoq, taama Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup immikkoortortaani pisortaq, Egill Steingrimsson oqarpoq.

Aalisarnermut Piniarnermullu Naalakkersuisoqarfimmi pisortaaneq Jørgen Isak Olsen pisortamut isumaqataalluinnarpoq assuarnartuunerarlugulu.

Kalaallit Nunaanni Uumasunut Nakorsaqarfik Inuussutissalerinermullu Oqartussaaffiup suliaasa ilagaat Kalaallit Nunaanni suliffeqarfinnik inuussutissalerisunik nakkutilliinermik isumaginnissalluni, taakku maleruagassanik eqqortitsinerat aamma pisisartunut nerisassanik nerinermikkut napparsimalinnginnissaat qulakkiissallugu.

- Inuussutissanik tuniniaasut nakkkutiginerulissallutigik pilersaarutigaarput, ingammik Brugsenip eqqaani tuniniaasut nakkutigineqassallutik, immikkoortortaqarfimmi pisortaq Naalakkersuisoqarfimmilu pisortaaneq oqarput.

Nalunaarummi aalajangersakkanik unioqqutitsineq arsaarinninnermik akiliisitsinermillu pineqaatissiissutigineqarsinnaavoq.

Attavigineqartussaq: Kalaallit Nunaanni Uumasunut Nakorsaqarfik Inuussutissalerinermullu Oqartussaaffik: Email: uumasut@nanoq.gl tlf: 345000