Partiit nutaat marluk qinigassanngortitsisinnaasutut akuerineqarput

Qinersineq

Qinersinermut Ataatsimiititaliap Inatsisartunut tullissaanik qinersinissamut Suleqatigiissitsisut aamma Nunatta Qitornai peqataasinnaatitaaneri pillugu ulloq 16. marts 2018 akuersissuteqarput.

Qinersisarneq pillugu inatsimmi § 11, imm. 2 naammassiniarlugu, inatsisartunut qinersinermi kingullermi taasinerit atorsinnaatitaasut tamavimmik 1/31-iisa nalinginit amerlassuseqartut partiip nutaap uppernarsaatitut pissarsiarissavai. Kommunini Innuttaasunik Sullissiviit nalunaarutigineqartut atsiorneqarsimasut piumasaqaatinik inatsisitigut aalajangersarneqarsimasunik naammassinnissimanersut misissorpaat. 2014-imi Inatsisartunut qinersisoqarmat taasinerit atorsinnaasut 29.201-iupput - taakkua 1/31-iisa nalingivaa 942-t.

Qinersinermut Ataatsimiitsitaliap Allattoqarfia oqaatigisinnaavaa, inatsimmi naammasseqqusaasut naammassineqartut. Taamaalilluni Suleqatigiissitsisut aamma Nunatta Qitornai tamarmik immikkut Kalaallit Nunaanni Inatsisartunut qinersisarneq pillugu Inatsisartut inatsisaanni nr. 9, 31. oktober 1996-imeersumi § 11, imm. 2-p piumasaqaatitai naammassivai, tamatuma kingorna § 11, imm. 4 naapertorlugu Qinersinermut Ataatsimiititaliap partiit atuuttuuneri akuerivai.

Attavissaq: Qinersinermi Ataatsimiititaliap allattoqarfia Klaus Georg Hansen Tlf. 34 51 11 kgh1@nanoq.gl.