Sunngiffimmi piniarnermut allagartaq maaji sioqqullugu akilereersimassaaq

Sunngiffimmi piniarnermut allagartaq 2018-mi 1. maaji sioqqullugu akilereersimassaaq

Aalisarnermut Piniarnermullu Naalakkersuisoqarfimmiit matumuuna nalunaarutigineqarpoq 2018-mi aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaanissamut sunngiffimmi piniarnermut allagartap tuttut umimmaallu pillugit nalunaarutit atuuttut malillugit 1. maaji sioqqullugu akilereerneqarnissaa. Sunngiffimmi piniarnermut allagartaq taamaalilluni kingusinnerpaamik 30. apriil 2018-mi akilereersimassaaq tuttunniarnissamut umimmanniarnissamullu akuersissutinik qinnuteqarniaraanni.

Tamanna pillugu 1. maajimi kingusinnerusukkulluunniit sunngiffimmi piniarnermut allagartamut akiliisimasut 2018-mi aasakkut ukiakkullu tuttunniarnissamut umimmanniarnissamullu akuersissutinik qinnuteqarsinnaassanngillat.

Ilutigalugu APN-ip paasisimavaa tuttunniarnissamut umimmanniarnissamullu akuersissutit tunniunneqartartut affai inorlugit utertinneqartartut. Akuersissutit pisanillu nalunaaruteqarneq piniarnerup naammassineqarnerata kingornatigut kingusinnerpaamik sapaatip akunnerisa marluk qaanngiunneranni utertinneqartussaapput tamannalu pisaqarsimanngikkaluaraanniluunniit aamma atuuppoq. Akuersissutit amigartumik utertinneqartarnerat pillugu tuttoqatigiit umimmaqatigiillu qanoq innerat nalileruminaappoq. 

Paasissutissanik suli allanik pissarserusukkaanni Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: APN@nanoq.gl

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl