OLT-EU-Forumimut peqataasoq

Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen Nunat Imarpiup akianiittunik Nunasiaataasimasunillu (OLT) ukiumoortumik ataatsimiinneranni EU-millu ataatsimeeqateqarnermi Bruxellesimi peqataavoq

Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen Nunat Imarpiup akianiittunik Nunasiaataasimasunillu (OLT) ministeriisa Europa-Kommissionilu OLT-EU-Forumimut Bruxellesimi peqataaqqammerpoq. EU-mi nunat ilaasortaasut Frankrig, Tuluit Nunaat, Holland aamma Danmark aallartitaqarlutik peqataapput. Danmark sinnerlugu Aallartitaq Lars Bo Larsen peqataavoq.
Oqalliffiup uuma siunertaraa illuatungeriit ataavartumik oqaloqatigiittarnerisa pilersinnissaat, taamatullu OLT-eermiut EU-mik suleqateqarnermi pisinnaatitaaffii periarfissaallu nukittorsarnissaat.

Forumimi qulequttatut pingaarneq tassaavoq ”Post 2020”. EU-p aningaasatigut missingersuutissaanni 2021-p tungaanut kingornalu atuuttussaq, akuersissutigineqannginnerani suliniutaasussat pingaarnertut inissisimapput, taamatullu Tuluit Nunaata EU-mit aninissaa Brexit eqqartorneqarput.
OLT-it kattuffianut, OCTA, Brexit immikkut kingunerluuteqarsinnaavoq, tassami Tuluit Nunaat ataani OLT-it OCTA-mut ilaasortaasut qulinguluat Bre-xitip kingunerisaannik OCTA-mit anisariaqalertussaapput. Taamaalilluni Brexitip kingunerisinnaavaa OCTA-mi ilaasortat 25-nit 16-inut appariarsinnaaneri.

Taassuma saniatigut OLT-imi ilaasortat sinneruttut Tuluit Nunaannut nioqqutissiaatiminik akitsuuteqanngitsumik tuniniarsinnaaneri annaasussaassavaat – Tuluillu Nunaata OLT-iivisa EU-mut niuersinnaaneq annaasussaallugu Brexitip kingorna. EU-p OCTA-mut tapiissutigisartagai aamma annikillisinnaanissaat kingunerisinnaavaa, Tuluimmi Nunaata anineratigut EU-p missingersuutaat annikillisussaammata. OLT-eermiut Europa-Kommissioni peqatigalugu “2020-Kingorna”-nalunaarusiamik (Post 2020), Brexitip OLT-eermiunut kingunerluutigisinnaasai ilanngullugit, suliaqartitsillutik aallartissimapput, tassuunakkut unammillernartuujumaartussat aaqqiissutissartaanik aallartitsisinnaajumallutik.

Suka K. Frederiksenittaaq erseqqissarpaa Kalaallit Nunaata kalaallillu aalisakkanik nioqqutissiaasa Tuluit Nunaanni niuerfinnut akitsuutitaqanngitsumik tuniniarsinnaatitaanerat pingaarutilerujussuusoq. OLT-it allat Frankrigip Hollandillu ataani inissisimasut peqatigalugit, Sukap OLT-it Tuluit Nunaat ataaniittut solidariteteqarfigalugit oqariartuuteqarfigivaat, kissaataannilu tapersersorlugit OLT-it kattuffianiiginnarsinnaanissaat, OCTA-mi, tassanilu EU-llu suleqatigiinneq attatiinnarnissaa – 2020 kingorna aamma Brexitip kingorna.

Europa-Kommissionip aningaasanut missingersuutit 2021-mut ukiunullu tulliuttunut tunngatillugu isumaqatigiinniutigineqarnerinut atatillugu OLT-eermiut soqutigisaat paasivai, erseqqissarlugulu OLT-mik suleqateqarnerup ingerlatiinnarnissaanik kissaateqarluni. Taassuma saniatigut EU-p OLT-eermiut peqatigalugit pisuussutit uumassusillit, nukissiutit ataavartut aammalu FN-ip piujuaannartitsineq pillugu 2030-mut anguniagai pillugit suliniuteqarnini ingerlatiinnassallugu uppernarsarpaa.

Attavissaq: Mininnguaq Kleist, mobil: +32 499 99 98 58, mail: mikl@nanoq.gl