Illoqarfinnut nunaqarfinnullu nunap assingi akeqanngitsut – siuariartornissamut pisariillisaanermullu iluaqutissat

2018-mut aningaasanut inatsisip pingajussaaneerneqarneranut atatillugu illoqarfinnut nunaqarfinnullu nunap assingi teknikkiusut akeqanngitsumik atorneqarsinnaanerat akeqassanngitsoq Inatsisartut aalajangerpaat. Taamaalilluni nunap assinginik nutarterineq, ineriartortitsineq siaruarterinerlu siunissami tamakkiisumik aningaasanut inatsisikkut aningaasalersorneqassaaq, taamaalillunilu atuisunit akiliut ataasiartumilluunniit akiliinerit  pisarunnaassallutik.

Aalajangerneq ulloq 1. januar 2018 aallarnerfigalugu atuutilerpoq. Geodatat pisortanit pigineqartut tamanut atugassanngortinneqarnerisigut suliniutit taamaattut inuiaqatigiit aningaasaqarnerannut namminersorlutik inuussutissarsiortut siuariartornerisigut pisortallu allaffissornikkut ingerlatsineranni pisariinnerusumik sulianik isumaginninnerit aqqutigalugit pitsaasumik kinguneqassasoq Naalakkersuisut naatsorsuutigaat. Nunap assinginik akeqanngitsumik pissarsiarineqarsinnaalerneq nunani allani misilittagaareersut toqqammavigalugit, suliffeqarfinnut namminersortunut, aallarnisaasunut, pisortat suliffeqarfiinut iluanaarfiussasoq paasissutissat takutippaat, taassumali saniatigut tunisassianik sullississutinillu nutaanik ineriartortitsinermut aamma iluaqutaassalluni.

Nunap assinginik teknikkiusunik tamanut atugassanngortitsineq Naalakkersuisut tunngaviusumik paasissutissanik, innuttaasunik, pisortat suliffeqarfiinik suliffeqarfinnillu allanik sullissinermik patajaallisaanermik suliaqarnerannut tapiliussaavoq – tamakkulu paasissutissanik atuinnarissanik toqqammaveqarput.

”Tunngaviusumik paasissutissat tamanit atorneqarsinnaasut namminersorlutik inuussutissarsiortuni siuariartornermik pilersitsinissamut annertuumik pingaaruteqarput, pisortallu suliffeqarfiini eqaannerusumik suleriaaseqarnermik qulakkeerinnittuullutik. Tamanna inuiaqatigiinnut pitsaasumik aningaasaliineruvoq”, Aatsitassanut Naalakkersuisoq Múte B. Egede oqarpoq.

 

Tamana qanoq kinguneqassava?

Nunap assingi teknikkiusut tamanut atugassanngortinneqartut nunatsinni illoqarfinni nunaqarfinnilu najugaqarfigineqartut makkua imarai:

•                    Vektorkort – teknikikkut nunap assingi, takussutissiivittut nunap assinga (G50) ilanngullugu

•                    Qatsissutsit – qatsissutit pillugit paasissutissat sukumiisut

•                    Ortofoto – silaannarmit assilisanit aaqqissuuteqqitanik  katitikkat

Allatut oqaatigalugu qarasaasiakkut nunap assingi pillugit paasissutissanik siaruarterineq maanna atuisunut akeeruppoq. Pisisartut nioqqutissanik anillatsitsivikkut anisitanik suliareqqitanilluunniit kissaateqartut – massakkutulli – Asiap sullissineranut immikkut akiliissapput.

Nunap assingi toqqammaviit sumi nassaarisinnaavakka?

Nunatta illoqarfiisa nunaqarfiisalu nunap assiliuunnissaannut akisussaaffik Asiamiippoq. Naalakkersuisut aalajangernerat ikorfartorniarlugu Asiap nunap assingi toqqammaviit FTP-serverimiittut tamanut atugassanngortippai. Nunap assinginik aallernermi paasissutissat sukumiisut uani pissarsiarineqarsinnaapput: www.asiaq.gl

Paasissutissat: Teknikikkut nunap assinginik toqqammavik

Nunap assinginik toqqammavik nunatsinni illoqarfinnut nunaqarfinnullu tunngaviusumik nunap assinginut aaguutaavoq. Teknikikkut nunap assinginik toqqammavik ataatsimut naleraavoq kikkunnillu tamanit nunap assinganik paasissutissaqarluartumik qatsissutsinillu paasissutissanik sukumiisunik imaqartumik piariaqartitsisunit atorneqartartoq. Paasissutissat tamarmik tukimut qatsissutsinullu tunngatillugu nutarterneqartarput, tassa x,y aamma z koordinaatitigut.

Nunap assinginik toqqammavik assersuutigalugu ledning-inik nammineq nalunaarsukkanik ilallugu atorneqarneqarsinnaavoq sanaartugassanillu pilersaarusiornermut naleqqulluinnartuulluni. Taamattaaq teknikikkut nunap assinginik toqqammavik sumiiffiit pillugit paasissutissiiffinni soorlu NunaGIS-imi GPS-lu atorlugu nunap assinginik biilinut atungassianut taamatullu apps-nut nunap assitalinnut toqqammaviuvoq.

Asiap nutarterinermik pilersaarunni naapertorlugu illoqarfiit nunaqarfiillu tamaasa ornittarpai, piffimmilu allannguutinik tamanik uuttortaasarluni. Tamatuma kingorna nunap assingi toqqammaaviit nutarterneqartarput, pitsaassusaat nalilersorneqarlutik kingornalu tamanut atungassiarineqarlutik. Nunap assinginik toqqammavinni atuisut assersuutigalugu tassaapput, sanaartortut, sanaartornermi siunnersortit, kommunit, Namminersorlutik Oqartussani Naalakkersuisoqarfiit suliffeqarfiillu taakku ataannittut, attavinnik piginnittut allarpassuillu. Tulliuttuni Narsami nunap assingata ilaa assersuutitut takutinneqarpoq.

Nunap assinganit toqqammavimmit tigusaq, Narsaq 2017, copyright Asiaq

Paasissutissat: Toqqammavittut paasissutissat

Toqqammavittut paasissutissat tassaapput inuit, suliffeqarfiit, illut, adressit & piffillu, nunalerutinut tunngasut, kiisalu nunallu assingi pillugit tunngaviusumik paasissutissat.

Toqqammavittut paasissutissat pisortani nalunaarsorneqartarput kikkunnillu tamanit – oqartussanit, suliffeqarfinnit innuttaasunillu - pisariitsumik isumannaatsumillu atorneqarsinnaasassallutik.

Toqqammavittut paasissutissanut qulaani taaneqartut nutarterneqarnerannut atorneqarnerannillu ataqatigiissaarinissaq siunertaavoq. Paasissutissat pissarsiariuminarnissaat oqartussaasullu assigiinngitsut immikkoortullu akimorlugit atorneqarsinnaanissaat siunertaalluni. Taamattaaq toqqammavittut paasissutissat akeqanngitsuusussaapput oqartussaasullu assigiinngitsut paasissutissanik assigiinnik nutarterisariaarutissapput.

Naalakkersuisut Den Fælles Offentlige IT Styregruppelu (FOIS) paasissutissat tamanit pissarsiarineqarsinnaasut pitsanngorsarnissaat pillugu  suleqatigiinnissamik isumaqatigiissuteqarput. Pilersaarut aaqqissuussaanikkut Digitalinngorsaanermik Aqutsisoqarfimmut inissinneqartoq, ilaatigut ataatsimut paasissutissanut periutsimik ataatsimut paasissutissanik agguaassivimmik tunngaviusumik paasissutissanik, pisortani inuinnarnilu atuisunut tutsuiginartumik patajaatsumillu siaruarterinissamik qulakkeerinninnissamik nassataqarpoq.

Issuaavik:http://digitalimik.gl/kl-GL/Losninger-og-infrastruktur/Grunddata-ny/Hvad-er-grunddata

Annertunerusumik paasisaqarusukkuit:

Bo Naamansen

Asiap pisortaa

bna@asiaq.gl

oqarasuaat 34 88 11