Naartuneq hashimillu atuineq pillugu sulisut susassaqarfinnit assigiinngitsuneersut MANU-mik pikkorissartinneqartut

Najoqqutassiami MANU-mi naartusunut angajoqqaanngortussanullu piareersarnertut pikkorissartitsineq Aasiannilu hashimik atuineq pillugu immikkut ittumik pikkorissartitsineq pikkorissartut 28 naammasseqqammerpaat. Immikkut ittumik pikkorissartitsinermi kommunimi peqqinnissaqarfimmilu sulisut naartusut ilaqutariillu naalungiarsuutillit hashimik atuilernissaannik pitsaaliuinermik pikkorissartinneqarput.

Najoqqutassiaq MANU tassaavoq naartusunut ilaqutariinnullu naalungiarsuutilinnut tamanut neqeroorut 2016-imiilli nuna tamakkerlugu ingerlanneqartoq. MANU maanna annertusineqarpoq taamaalilluni naartusunut ilaqutariinnullu naalungiarsuutilinnut hashimik atuinermik unamminiarnartitalinnut neqerooruteqalerluni.

-”Nuannaarutigaara MANU-mik pikkorissartitsinermut nutaamut peqataanissamut taama soqutiginnittoqartigimmat. Neriuppunga pikkorissartinneqartut ilisimaligaat piginnaaneqarfigiligaallu naartusunut ilaqutariinnullu naalungiarsuutilinnut amerlasuunut iluaqutaassasoq, aamma naartusut ilaqutariillu hashimut naaggaarnissaannut tapertaassasut, ” taama Peqqissutsimut Naalakkersuisoq, Agathe Fontain, oqarpoq.

Neqeroorut nutaaq innuttaasut peqqissusaannik suliniummi Inuuneritta II-mi hashimut suliniutaasunut ilaavoq. Inuuneritta II-mi hashimik atornerluinermik pitsaaliuineq pingaartinneqarluinnarpoq, aamma ukiuni 2013-2019 suliniutigineqarpoq naartusut hashimik atuisuunnginnissaat meeqqallu inersimasunik ikiaroortunik takusaqannginnissaat.

Pikkorissartitsinermi peqataasut hashi pillugu ilisimasat nutaanerpaat, haship qanoq sunniuteqartarnera, hashi naartumut meeqqamillu milutsitsinermut peqqissutsikkut ilaqutariittullu naalungiarsuuteqarluni inuunermut qanoq sunniuteqartartoq ilinniarpaat.

Maanna inuit 48-t illoqarfinnit nunaqarfinnillu assigiinngitsuneersut pikkorissartitsinermik naammassinnissimapput. Pikkorissartut peqqinnissaqarfinneersuullutillu kommunineersuupput.

MANU-mi hashi naartunerlu pillugit immikkut ittumik neqerooruteqartoqarnerani pingaarnertut siunertaavoq hashimik pujortartarnerup peqqissutsikkut, isumakkut inooqataanikkullu sunniutai pillugit paasissutissiinikkut qaammarsaanissaq.

Naartunerup ilaqutariinnilu naalungiarsuuteqarnerup nalaani angutip arnallu hashimik atuiunnaarnissamik kajumissaarinissaannut sulisut ilinniarsimasut ikiuisalernissaannik tunngaviliinissaq siunertarineqarpoq.


Paasisaqarnerujumallutit attavigiuk naalakkersuisup allattaa Nauja Møller mobilikkut: +299 58 26 54 imaluunniit e-mailikkut: nmoe@nanoq.gl