Pituffik pillugu isumaqatigiinniarnerit suli ingerlapput

All.: Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen

"Pituffik pillugu isumaqatigiinniarnerit suli ingerlapput – taamaattorli illuatungerit isumaqatigiinniartut tunngaviusumik tatigeqatigiinnissaat pisariaqarpoq:

Pituffimmut suliami Kalaallit Nunaata/Danmarkip USA-llu akornanni isumaqatigiinniarneq ingerlaqqippoq. Taamaattorli soorunami maanna isumaqatigiinniarnerit imarisai immikkuualuttut ilisimatitsissutigisinnaanngilavut.

Piffissat ilaanni isumaqatigiinniarnerit aporfeqartarput qaangerniartariaqartunik, tamannalu ilisimaneqareerpoq, taamaattorli amerikamiut nunatsinniinnerminni inuiaqatigiinnut kalaallinut pitsaanerpaamik pissarsissutiginissaa pillugu suli periarfissaqartoq nalilerparput.

Nunanut allanut tunngassutilinni akisussaasuunerma nalaani isumaqatigiinniarnerit arlaannaatigulluunnit unittoorsimanngillat, ilisimasatsitulli suna tamarmi piffissamik tigusisarput, siusinnerusukkullu ilisimatitsissutigeriikkattut suli periarfissanik aqqutissaqarpoq.

Taamaattorli naqissusissavara ajuusaarnartuummat isumaqatigiinniarnerit ingerlanneqarnerini paasissutissat avammut saqqummiunneqartassappata. Taamaaliorneq inuiaqatigiinnut kalaallinut pitsaanerpaamik angusaqarniarnermi periarfissagut eqqarsaatigalugit soqutigittaannerussammat. Isertuussinissarlu una pillugu Naalakkersuisunit, danskit naalakkersuisuinit, politikkikkullu ataatsimiititaliat isumaqatigiinniarnerit ingerlasimanerannik, killiffiannik ineriartornerannillu ilisimatittuarneqarnerini isertuussassaq isumaqatigiissutigeqqissaarneqartarmat.

Naggasiutigalugu naqissuserusuppara siornali aprilimi isumaqatiginniarfitsinnut tatiginassuserput pilerseqqinniarlugu sulineq ingerlanneqarpoq, tassani diplomatiimi ingerlaffissat malinneqarnissaat, taamatullu isumaqatigiinniaqatitut tutsuiginartuunissarput kissaatigilluinnarpara.

Isertuussisussaatitaanermik, taamaalilluni akaareqatigiinnermik tatiginassutsimillu takutitsinnginneq ajoraluartumik suliap inernissaanut nunatsinnullu iluaqusissaanissaraluanik  innarliisinnaavoq."

Sukumiinerusumik paasisaqarusuttut attavigisinnaavaat Naalakkersuisoqarfimmi pisortaq Kenneth Høegh, oqarasuaat +299 565604  imaluunniit e-mailikkut: kenh@nanoq.gl