Marsip aallaqqaataaniit imigassamik politikkit pillugit malittarisassat nutaat

Imigassaq pillugu inatsit nutaaq 2018-imi marsip aallaqqaataanni atuutilerpat marlunnik imigassamik politikkeqarnissaa inatsisitigut piumasaqaataalissaaq. Ilaatigut pisortat namminersortullu suliffeqarfiutaat ataatsimit amerlanerusunik sulisullit suliffeqarfimmi imigassaq pillugu politikkeqassapput. Ilaatigut imigassamik tuniniaasinnaanermut imaluunniit sassaalliisinnaanermut akuersissutinik nutaanik qinnuteqaateqartoqartillugu tamatigut imigassaq pillugu politikki ilanngullugu nassiunneqartarnissaanik piumasaqaateqalissaaq.

Peqqissutsimut Naalakkersuisoq, Agathe Fontain, imigassaq pillugu politikkinut marlunnut piumasaqaateqarnermut tunngaviusoq pillugu ima oqaluttuarpoq:

”Suliffeqarfinni tamani ataatsimit amerlanerusunik sulisulinni imigassaq pillugu politikkeqarnissamik atulersitsineq imigassamut tunngatillugu pitsaaliuilluni iliuuseqarnermi pingaaruteqarpoq. Imigassaq pillugu politikkiliornikkut qulakkeerneqassaaq suliffeqarfiup imigassaq pillugu isummernissaa aamma imigassamut tunngatillugu unamminiarnartunngorsinnaasunik qanoq aaqqiinissamut pilersaaruteqartuarnissaa. Assersuutigalugu sulisoq imigassamik ajornartorsiuteqarpat tamanna atuuppoq. Suliffeqarfiit amerlasuut imigassaq pillugu politikkeqarput taamaalillutillu imigassaq pillugu inatsimmi piumasaqaatinik eqquutsitsereerlutik,” taama Peqqissutsimut Naalakkersuisoq, Agathe Fontain, oqarpoq nangillunilu:

Taamatuttaaq imigassaq pillugu akuersissummik nutaamik qinnuteqaasiornermi imigassaq pillugu politikkeqarnissamik piumasaqaat pitsaaliuinermut iluaqutaassaaq. Imigassamik aalajangersimasumik tuniniaanissamut imaluunniit sassaalliuteqarnissamut qinnuteqaateqartoq nassuiaassaaq akuersissummik pigisaqartup qanoq qulakkiissagaa akisussaassuseqartumik imigassamik tuniniaasoqassasoq imaluunniit sassaalliisoqassasoq.”

Qujanartumik imigassaq pillugu politikkiliornermi suliffeqarfiit akuersissutinillu qinnuteqaateqartut iluaqutissaqarput.

Suliffeqarfiit imigassaq pillugu politikkiliortussat suliffeqarfinnut aanngajaarniutit pillugit politikkiliornissanut najoqqutassiaq, Allorfimmit – Pinngitsuuisinnaannginnermik Ilisimasaqarfimmit – saqqummersinneqartoq, isumassarsiorfigisinnaavaat. Kaammattuutigineqarpoq imigassaq pillugu politikkimi tamatigut sulisup atornerluisalersimasup qanoq ikiorneqarnissaanut pilersaaruteqarnissaa. Aangajaarniutit pinnguaatillu pillugit suliffeqarfiit suliniuteqarnerannut najoqqutassiaq  Allorfik.gl-imi aamma Peqqik.gl-imi takuneqarsinnaavoq.

2018-imi marsip aallaqqaataat aallarnerfigalugu aalajangersimasumik imigassaq pillugu akuersissutinut qinnuteqaatinut nutaanut tamanut imigassaq pillugu politikki kommunalbestyrelsimut qinnuteqaammut  ilanngullugu nassiunneqartalissaaq, tamatumanilu nassuiarneqassaaq akuersissummik pigisaqartup qanoq akisussaassuseqartumik imigassamik tuniniaasoqarnissaa imaluunniit sassaalliisoqarnissaa qulakkiissagaa. Sullissivik.gl-imi imigassaq pillugu politikkimut immersugassaqarpoq, taanna qinnuteqartup immersorsinnaavaa imigassarlu pillugu akuersissummik qinnuteqaamminut ilanngullugu nassiussinnaallugu.

Imigassaq pillugu politikkilioernissamut ilitsersuutit ukunani pissarsiarineqarsinnaapput:

peqqik.glallorfik.gl aamma sullissivik.gl

Paasisaqarnerujumallutit attavigiuk naalakkersuisup allattaa Nauja Møller mobilikkut: +299 58 26 54 imaluunniit e-mailikkut: nmoe@nanoq.gl