2102_suka_bruxelles

Naalakkersuisoq Suka K. Frederiksenip Europa-Kommissionimi pisortaq Jolita Butkeviciene, Europa-Parlamentimi ilaasortamik Christel Schaldemosemik Danmarkip EU-mi Ataavartumik Sinniisuanik Kim Jørgensenimik aammalu Savalimmiut EU-mut Suliaqarfiani Sinniisoqarfiup pisortaanik Kate Sandersonimik ataatsimeeqateqarpoq

Sapaatip akunnerata uumap naanerani Bruxellesimi Namminiilivinnermut, Nunanut Allanut Nunalerinermullu Naalakkersuisup Nunat Imarpiup akianiittunik Nunasiaataasimasunillu (OLT)-mi ukiumoortumik ataatsimeersuarnermi aammalu OLT-p minsteriisa ataatsimiinneranni peqataanermi saniatigut Europa-Kommissioni, Kalaallit Nunaat Danmarkilu pingasuullutik Suleqatigiinnermut isumaqatigiissut pillugu ataatsimiinneranni ullumi peqataavoq.
Ataatsimiinnermi pingaarnertut EU-Kalaallit Nunaata suleqatigiinnissamut isumaqatigiissutaat eqqartorneqarpoq, tassungalu ilanngullugu ilinniartitaanerup tungaatigut isumaqatigiissutip atuutilersinnissaa oqaluuserineqarpoq. Kalaallit Nunaata tungaanit Suleqatigiinnissamut Isumaqatigiissutip suleqatigiinnerup pitsaasup ingerlateqqinnissaa, periarfissaqarpallu ilassuteqarfiginissaa ilinniartitaanerup saniatigut suliassaqarfinnut arlariinnut isumaqatigiissutip ilanissaanut periarfissat misissorneqarsinnaaneri Naalakkersuisup oqariartuutigaa. Europa-Kommissionip Kalaallit Nunaannik suleqateqarnerup atuutilersinnera pillugu naammagisimaarinnipput, naqissuserlugulu suleatigiinnerup annertusarnissaanut aamma namminneq kissaatigalugu.

Nangitsigalugu Naalakkersuisup Europa-Parlamentimi ilaasortaq Christel Schaldemose (Soc.dem.) ataatsimeeqatigaa, tassani Brexit Suleqatigiinnissamullu Isumaqatigiissut pingaarnertut qulequtarineqarput. Suleqatigiinnissamut Isumaqatigiissut eqqarsaatigalugu EU-mik suleqateqarnerup immikkoortumi tassani ingerlatiinnarneqarnissaa, pingaartumillu 2021 aallarnerfigalugu ukiuni arlalinni siumut missingersuusiornissaq kissaatigineqartoq Suka K. Frederiksenip oqariartuutigaa. Taakku saniatigut ilaatigut OLT-mi nunatut Tuluit Nunaata EU-mit avissaareernerata kingorna Tuluit Nunaannik niueqateqarnerup pitsaasumik atugassaqartitaanerup ingerlatiinnarneqarnissaa, taamatullu EU-p Tuluit Nunaatalu Brexit pillugu isumaqatigiinniarneranni Kalaallit Nunaannut OLT-eermiunullu isumaqatigiinniarnermut iluaqutaasinnaasunik ilanngunneqarsinnaanersut periarfissat misissorneqassasut. Tassunga atatillugu kalaallit soqutigisaat MEP Christel Schaldemosemit paasineqarluarput, neriorsuutigalugulu Europa-Parlamentimi ilaasortaaqatiminut qulequtaq tamanna ingerlateqqissallugu.

Europa-Parlamentimi ataatsimeereernerup kingornatigut Naalakkersuisoq kalaallillu sinniisui Savalimmiut EU-mut Suliaqarfiani Sinniisoqarfiup pisortaanik Kate Sandersonimik ataatsimeeqateqarput, tassani Brexitimut isumaqatigiinniarnerni unammillernarsinnaasut illuatungeriit oqaloqatigiissutigaat, taamatullu Savalimmiormiut EU-mut tunngasunik suleriaasiat pillugu tusarniaasoqarpoq.

Ulloq naggaserlugu Danmarkip EU-mi Ataavartumik Aallartitaannik Kim Jørgensenimik danskillu nunanut allanut attaveqaataannik allanik ataatsimeeqatiginnittoqarpoq, tassani Kalaallit Nunaata Suleqatigiinnissamut Isumaqatigiissut, Brexit EU-milu aningaasanut missingersuutit pillugit isumaqatigiinniarnissaq (MFF) pillugit eqqartuillutik ataatsimeeqatiginnipput. Isumaqatigiinniarnermi tassani Kalaallit Nunaata soqutigisai danskit tungaannit ataavartumik sulissutigineqarnerat Aallartitap erseqqissarpaa.

Attavissaq: Mininnguaq Kleist, mail mikl@nanoq.gl, mobil: +32 499 99 98 58