Microsoftip Naalakkersuisut blacklistersimavai (tatiginanngitsutut mattusimaqqavai)

Selvstyrebygningen i Nuuk

Namminersorlutik Oqartussat innuttaasunik amerlasuunik attaveqarsinnaajunnaartitaasimapput, taakkulu soorlu SKAT-imiit kiffartuussivinnillu allanit allagarsisinnaajunnaarsimapput allaat.

Tamatumunnga pisutaassimavoq Namminersorlutik Oqartussani sulisut ilaata nammineq qarasaasiani atorlugu Namminersorlutik Oqartussat webmailiannut januaari qaammat naalersoq isersimasimammat. Sunaaffa qarasaasiaq taanna malwarenik imaqarsimasoq, tamannalu pissutigalugu Namminersorlutik Oqartussanit mailit tusintilippassuit nassiussuunneqarsimallutik. Akunnerit arlaqanngitsut qaangiummata Namminersorlutik Oqartussanit maleware-t qarasaasiamit tassannga pisut unitsinneqarput ingerlaannarlu Microsoft attavigineqarpoq ajornartorsiut aaqqinneqarsimasoq nalunaarutigalugu, Namminersorlutillu Oqartussat mailsystemiat ajoquteqarunnaartoq unnerlugu.

Taamaattoq innuttaasut ilaat Namminersorlutik Oqartussanut suli attaveqarsinnaanngillat. Attaveqarsinnaanngitsullu mailinik nassiussuillutik kiffartuussivinnit makkuninnga atuisuupput: hotmail, livemail aamma Outlook.dk. Naak ullut tamaasa Namminersorlutik Oqartussanit Microsoftimut saaffiginnittaraluarluta suli qisuariarfigineqarsimanngilagut.

Ajornartorsiut annertuvoq, tassami innuttaasut amerlasuut hotmail-imut nuunnikuummata greennet.gl atorunnaarmalli. 

Tamanna pissutigalugu Namminersorlutik Oqartussanit innuttaasut kaammattussavagut mailinik akeqanngitsumik neqerooruteqartartut allat atortaleqqullugit soorlu gmail, sulimi ajornartorsiut qaangerneqarsinnaarpasinngimmat, Microsoftip Namminersorlutik Oqartussat ullut tamaasa saaffiginnissutigisartagai akineq ajormagit. 


Annertunerusumik paasisaqarusukkuit uunga attaveqarit: It chef Tony Ditlevsdal mobil +299 55 58 12 mail todi@nanoq.gl