Naalakkersuisut Sisimiuni innuttaasunik ataatsimiititsinerat soqutigineqarluartoq

Naalakkersuisut Sisimiuni innuttaasunik sapaammi 18. februaari 2018 Taseralimmi ataatsimiititsimmata innuttaasut 165-it missaat takkupput.

Innuttaasunik ataatsimiititsinermit assit takukkit.

Naalakkersuisut Siulittaasuata Kim Kielsenip Naalakkersuisunullu ilaasortat Sara Olsvigip, Karl-Kristian Krusep, Doris J. Jensenip, Agathe Fontainip aamma Erik Jensenip Naalakkersuisut qinigaaffimmi uani anguniakkamik piviusunngortinniarlugit sulinertik pillugu oqaluttuarput.

Innuttaasut takkuttut Naalakkersuisunut apeqqutaat ilaatigut attaveqaqatigiinnermik ineriartortitsinermut, ilanngullugu Kangerlussuarmut aqqusinniorniarnermut, aalisarnermik inuussutissarsiutip ineriartortinneqarnissaanut, aallartisaanermut takornariaqarnermullu kiisalu mittarfiliortiternissat aningaasalersornissaanut sunniutissaanullu tunngassuteqarput. Aamma apeqqutigineqarput amerlanerusut ilinniagaqalernissaannut aalisakkerinerullu iluani qaffasissumik ilinniagaqarsinnaalernissaannut, lærlinget aningaasarsiaannut, ikiaroornartumik eqqussuinerup akiorniarneranut, utoqqalinersiallit atugaannut, kræftimik nappaateqartut ilaqutaannut, naartunik peersitsisarnerit pinaveersimatinniarnerannut eqqagassalerinernullu tunngassuteqartut.

Naalakkersuisut Siulittaasuat Kim Kielsen oqarpoq:

- Innuttaasunik ataatsimiititsinerup silagissuarmit unammillerneqaraluaruni taamak amerlatigisut takkummata nuanneqaaq. Ataatsimiinneq nuannersumik ingerlavoq Naalakkersuisullu sulinerannut apeqqutit oqaaseqaatillu soqutiginarput.

- Nunap inuinullu ataatsimoortumik pilersaarusiorlunilu aalajangersaanissaq Naalakkersuisut suliassaraat. Aalajangikkagulli pillugit innuttaasut isumaat aqqusaagaallu pillugit tusarnissaat tusassallugit aamma pingaaruteqarpoq. Inooriaasiannut inuussutissarsiutaannullu qanoq sunniuteqarpat? Innuttaasut isumaasa sukkut aaqqitassaqarsinnaanerannik ersiutaapput nunarpullu pillugu sulinitta ingerlateriaqqinnissaannut eqqarsaatissiisarlutik.

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist oqarasuaat +299 55 94 24 imaluunniit e-mail paok@nanoq.gl.