Pissassarfimmik aamma Tiliumik ammaaneq

”Ulloq tamatsinnut pingaaruteqarluinnartoq”, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisup nuna tamakkerlugu inunnut innarluutilinnut sullissivik Pissassarfik ullumi pisortatigoortumik ammarpaa

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig Sisimiuniippoq ullumilu nal. 13.00 nuna tamakkerlugu inunnut innarluutilinnut sullissivik Pissassarfik pisortatigoortumik ammarlugu. Ullumi Pissassarfiup ammarneqarnera sioqqullugu ukiuni sisamani pilersaarusiortoqarlunilu piareersaasoqarsimavoq. Sanaartornissap piareersarneqarnera aamma sullissivimmi sammisassat sullissiviullu aaqqissorneqarnera suleqatit arlallit qanimut suleqatigalugit pisimavoq.

”Ulloq manna tulluusimaarlunga neriuuteqarluarlungalu qilanaarisimavara. Nuna tamakkerlugu Inunnut Innarluutilinnut Sullissivissata – Pissassarfiup ammarneqarneratigut inuit innarluutillit atugaannik pitsaanerulersitsinissamut pingaarutilimmik malunnaatilimmillu alloriarpugut.(…) Pissassarfik pilersinniarlugu peqataasimasut suleqataasimasullu tamaasa qujaffigerusuppakka. Suliaq sivisuumik ingerlanneqarsimavoq unnersiutigaaralu qanimut tigussaasumillu suleqatigiissimaneq.” Sara Olsvig ammaanersiorluni oqalugiaatimini taama oqarpoq.

Sara Olsvig Sisimiuniinnermi aamma ”Tilioq” inunnut innarluutilinnut illersuisoqarfik pilersinneqaqqammersoq ammaanersiorneqarmat peqataavoq”. Inuit Innarluutillit illersuisussaanik pilersitsinissaq 2017-imi upernaakkut ataatsimiinnermi Inatsisartunit aalajangiunneqarpoq. Inuit Innarluutillit illersuisuat inuit innarluutillit taakkulu qanigisaat sinnerlugit oqaaseqartartuussaaq. Inuit Innarluutillit illersuisuat ilaatigut pisinnaatitaaffiit naammagittaalliuuteqarsinnaanerlu pillugit siunnersuillunilu ilitsersuisassaaq kiisalu inuit innarluutillit atugarisaannik siuarsaallunilu qitiutitsissalluni.

Tiliup ammaanersiorneqarnerani peqataasinnaagama nuannaarutigeqaara. Tilioq pisinnaatitaaffiit pillugit suliffeqarfiuvoq inuit innarluutillit pisinnaatitaaffiinik siuarsaanissamut qitiutitsisoq. Tassa Pissassarfimmik ammaanermut peqatigitillugu inunnut innarluutilinnut tunngasutigut suliaqarfimmi suliarineqartartut aamma inuit innarluutillit atugarisaannik pisinnaatitaaffiinilu qitiutitsineq nukittorsarneqassapput. Ullumikkut ulloq tamatsinnut pingaaruteqarluinnarpoq,” Sara Olsvig Tilioq ammaanersiorneqarmat taamatut oqaaseqarpoq.

Paasissutissat allat naalakkersuisup allattaanut saaffiginnilluni pissarsiarineqarsinnaapput: Upaluk Poppel, oqarasuaat 53 93 71.