Atortussat nutaat pikkorissarnerillu naartusut ikiaroortarnermik ajornartorsiuteqartut tapersersussavai

Ilaqutariit meerartaalersut angajoqqaanngorlaallu ikiaroornartumik ajornartorsiuteqartut, maanna ikiaroortarunnaarnissaminnut tapersersorneqarnerulissapput.

Peqqissutsimut Naalakkersuisoqarfik aamma Angajoqqaanngornissamut piareersaasarneq - MANU suliffeqarfik namminersortoq ”God Barndom” suleqatigalugu ”MANU Hash” ineriartortippaat. ”MANU hash” tassaavoq ilaqutariinnik meerartaalersunik ilaqutariinngorlaanillu, ikiaroornartumik ajornartorsiuteqartunik atuinerannik unitsitsinissamut tapersersuerpalaartumik akuersaarinnittumillu sulisut kajumissaanissaannut piareersaasussamik atortussanik pikkorissaanissanillu ataatsimoortunik imalik.

Ulluni makkunani ”MANU hash” ernisussiortunut, peqqissaasunut, ilaqutariinnut sullissivinni sulisunut kiisalu Allorfik Nuummi Aasiannilu sulisunut pikkorissartitsissutigineqalereerpoq.

”MANU hash”-imik anguniagaavoq, meeqqat kikkulluunniit naartuunerminni alliartornerminnilu ikiaroornartumik sunnerneqannginnissaat. Naartusoq ikiaroornartumik pujortaraagat, meeraaqqap naartuusup qarasaa sunnerneqartarpoq.
Tamatuma kingunerisinnavaa meeqqap inuunermi ilaani ilikkariartornissaminut akornuteqarsinnaanera. Ilaqutariinneq meeqqallu alliartornerat akornuserneqarsinnaapput, ikiaroorneq angajoqqaat inuunerannut ilaappat.

”MANU hash” ilaqutariinnut meerartaalersunut kiisalu angajoqqaanngorlaanut atortussanik imaqarpoq. Matumanilu oqaatiginiagaq ersarippoq – ikiaroortarneq UNITSILLI. Ikiaroornartoq meeqqallu imminnut tulluutinngilluinnarput.

Atortussat tamarmik Christian Rex-imit ilusilersorluarneqarput, soorlu filmiliaaraq titartagaq spotsillu suliarinikuugai, taakku naartunermi meeraarartaqarlunilu ilaqutariinnermi ikiaroornartumik atuinerup kingunerisinnaasaanik ilisimasaqalersitseqataassapput.

”Neriuppunga ilaqutariit meerartaalersut kiisalu ilaqutariinngorlaat, ikiaroornartumik atuisuusut neqeroorummik tapersersuutaasumik matuminnga tigusilluassasut. Meeqqat tamarmik pitsaasumik toqqissisimasumillu peroriartortariaqarput, ikiaroornartumik sunnertisimasunik angajoqqaaqarnatik” Agathe Fontain, Peqqissutsimut Naalakkersuisoq oqarpoq.

Paasissutissat sukumiinerusut pissarsiariniarlugit attavigiuk naalakkersuisup allattaa Nauja Møller mobilimut: +299 58 26 54 imaluunniit e-mailimut: nmoe@nanoq.gl