USA-mik Canadamillu attaveqarneq Naalakkersuisup nukittorsarusuppaa

Kalaallit Nunaata Amerika Avannarliullu suleqatigiinnerisa annertusarneqarnissaannut periarfissat oqaloqatigiissutiginiarlugit Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen Washington D.C.-mi aamma Canadami Ottawami naalakkersuisut aallartitaat inuillu naalakkersuinermik suliaqanngitsut januaarip 29-annit februarip sisamaat ilanngullugu ataatsimeeqatigai.

Eqqarsartartoqatigiinni The Woodrow Wilson Centerimi The Polar Initiativep pisortaata Mike Sfraga-p Naalakkersusut sinnerlugit, Kalaallit Nunaat saqqumilaarnerutinniarlugu aaqqissuussinernut assigiinngitsunut taamatullu USA-mik suleqarnerusinnaanerup ukkatarineqarnerunissaa anguniarlugu eqqarsartartoqatigiinnik atuisinnaaneq taperserpaa. Suleqatigiinneq qulequtserneqarsimavoq ”Greenland Diologues”.

”USA-mik suleqateqarnerusinnaanermut periarfissarpassuit atorneqanngitsut amerlapput, tamakkulu eqqortumik atoraanni illuatungeriinnut iluaqutaalluarsinnaapput. Qulequttat Kalaallit Nunaannut tunngasut saqqumilaartinniarlugit Wilson Centeret-ip soqutiginninnera qutsatigaarput, The Polar Initiativep pisortaa Mike ilisimatippara suleqatigiinnissamut qilanaarluta.” Naalakkersuisoq oqarpoq:

Naalakkersuisup Suka K. Frederiksenip Deputy assisting Secretary-iugallartoq Sharon Hudson-Dean aamma ataatsimeeqatigaa, tassani qulequttat assigiinngitsut ataatsimut soqutigisanut sammisinnaasut eqqartorneqarput. Naalakkersuisumit State Departmentimut oqaatigineqarpoq Pituffik pillugu isumaqatigiinniarnerit siumut ingerlanissaat politikkikkut annertuumik kissaatigineqartoq, taamatullu amerikamiut Kalaallit Nunaanni sakkutooqarfeqarnerat kalaallinut inuiaqatigiinnut iluaqutaasariaqartoq.  State Departmentimut erseqqissaatigineqarportaaq politikikkut tamanna pingaartinneqarluni ingerlanneqartoq.

Ottawami Canadamiut Nothern Lightsimik taallugu februarip aallaqqaataanit pingajuannut ataatsimeersuarneranni Naalakkersuisoq peqataavoq, ataatsimeersuarnerup siunertaraa Canadami Issittoqarfiit Nunavut, Nunavik, Labrador / Nunatsiavut taakkulu suliffeqarfiutaasa, tunisassiorneri, oqaluttuarisaanerat kulturiisalu saqqumilaartinnissaat. Kalaallit Nunaat kisiartaalluni nunat Canadap avataaneersutut qaaqqusaavoq, tassani Kalaallit Nunaannit isigalugu suleqatigiiffiusinnaasut saqqummiunneqarlutik.

Kalaallit Nunaannik suleqateqarsinnaaneq pillugu taamatullu Issittumi nunat immikkoortui Nunavunni, Northwest Territoriami, Yukonimi Alaskamilu innuttaasunut iluaqutaasussanik sumiiffinni suleqatigiissinnaanerit pillugit ataatsimiinnerni Naalakkersuisoq peqataavoq.

Kalaallit Nunaannik suleqateqarsinnaaneq pillugu (Greenland Opportunities: Foreign New Partnerships) ataatsimiinnermi periarfissaq atorluarlugu Naalakkersuisut pingaarnersiuinerat suliniutillu ingerlaartut soorlu nunami attaveqaqatigiinnermut aningaasaliinerit, mittarfiliortiterneq, takornariaqarneq, aatsitassarsiorneq taamatullu erngup nukinganik innaallagissiorfiliortitsernerit Naalakkersuisup ilisimatitsissutigai.

Suka K. Frederiksenip erseqqisaatigaa Amerikap Avannaani sanilerisanut niuernikkut, aningaasalersuinissarlu eqqarsaatigalugit Kalaallit Nunaat ammatitsisoq. Angallannikkut assartuinikkullu aaqqissuusseqqinneq pingaarnertut, tassani Royal Arctic Linep Eimskip peqatigalugu siunissami angallassisalernissaa, Nuummi talittarfissuaq Sikuki Nuuk Harbour taamatullu mittarfiliassatut suliniutit pingasut eqqarsaatigalugit Amerikap Avannaanik suleqateqarnerulernissamut periarfissanik nutaanik ammaassapput.

Nunavunni naalakkersuisut siulittaasuat Paul Quassa, Northwest Territoriesimi naalakkersuisut siulittaasuat Bob McLeod, Yokunimi naalakkersuisut siulittaasuat Sandy Silver Alaskallu guvernøriata tullia Byron Mallot peqatigalugit Suka K. Frederiksen avannaamioqatigiit sumiiffiit akimorlugit suleqatigiinneranni sumiiffiit aningaasaqarnikkut ineriartornissamut periarfissai pillugit oqallinnermi peqataavoq. Sumiiffiit siuttuisa tigussaanerusumik suleqatigiinnissaq soqutigaat, ingerlariaqqinnissamullu periarfissat ujartornissaat pillugit ataatsimeeqqissinnaanermut ulluliisinnaaneq soqutigalugu.

Ataatsimiinnerup ingerlanerani isiginnaarutikkut ilisimatitsinermini Alaskami Senatorip Lisa Murkowskip amerikamiut Nuummi konsuuleqarfeqalernissaanik suliniuteqarneq taperserpaa. Naalakkersuisoq ima oqaaseqarpoq: ”Nuummi konsuuleqarfeqalernissamut Alaskami Senatorip Lisa Murkowskip oqariartuutaa tamakkiisumik taperserpara. Imminut tikilluni suleqatigiinnerulernissamut atugassarititaasut attaveqaqatigiinnermuinnaq tunngassuteqaannanngilaq - immitsinnut aamma oqaloqatigiissinnaanerusariaqarpugut. USA-mi 2014-imili sinniisoqarfeqalerpugut. Amerikamiullu Nuummi sinniisoqalerpata USA-mik suleqateqarnermut annertuumik iluaqutaassaaq. USA-mi oqartarnerattut oqassaanga ’we are open for business’.

Ataatsimeersuarnermut peqataaneq iluatsillugu Nunavummi naalakkersuisut siulittaasortaavannik Paul Quassamik illuatungeriilluni ataatsimeeqarnissaq periarfissinneqarpoq. Tamanna iluatsillugu qinersinerup inerneranik Quassa Naalakkersuisumit pilluaqquneqarpoq, naqissuserneqarlunilu Kalaallit Nunaata Nunavummut nukittuumik attaveqarnera Naalakkersuisunit pingaartinneqartoq. Quassap Frederiksenillu suleqatigiiffiusinnaasut nukittorsarneqarnissaat pillugit oqaloqatigiipput, tassani pingaartumik ilinniartitaanikkut, oqaatsit kulturilu kiisalu aamma attaveqaqatigiinneq nunat marlut akornanni timmisartuussisarnerup ammaqqissinnaanera eqqartorneqarlutik. Paul Quassap 2018-ip ingerlanerani Kalaallit Nunaannut tikeraarsinnaanini soqutigalugu oqaatigaa, .Qulequttanut eqqartueqatigiinnissaat Naalakkersuisut tikilluaqqusinerat ilassilluarneqarpoq.

Ataatsimeersuarnermut peqataaneq iluatsillugu aamma Nunatsiavummi aqutsisoq Labradorimi Inuit sinniisuat Johannes Lampe ataatsimeeqatigineqarpoq. Naapeqatigiinnermi periarfissaq iluatsillugu Nunatsiavummi Labradorimi aningaasarsiornikkut maannakkut isaatitsiffigilluagaanni nikkilisiorfimmi Voisey Baymi misilittakkat tusartinneqarput.

Suka K. Frederiksenip Greenland Opportunitiesimi oqalugiaataa (tuluttut)

Suka K. Frederiksenip oqalugiaataa ”Leading Development in the North American Arctic” (tuluttut)

Paasisaqarnerorusuttut attavigisinnaavaat:
Naalakkersuisoqarfiup pisortaa Kenneth Høegh oqarasuaat +299 565604 imaluunniit e-mail kenh@nanoq.gl

Washington, D.C.-mi Sinniisoqarfiup pisortaa Inuuteq Holm Olsen, oqarasuaat +1 202 431 1660 imaluunniit e-mail inol@nanoq.gl

(The Woodrow Wilson Centerets tassaavoq USA-mi eqqarsartartoqatigiit tusaamasaanerpaat ilaat 2017-imi aallartittut ”The Polar Initiative”, Washington D.C.-mi innuttaasunut politikkikkullu sulialinnut issittoq pillugu suliat siammasinnerulernissaannik ukkatarinnittut)

 

 

 

Oqallisinnginnermi Amerikap Avannaani Issittumi siuttut. Saamerlermit talerpimmut: Premier Sandy Silver, Nunavut Premier Paul Quassa, Naalakkersuisoq Suka K. Frederiksen, Northwest Territories Premier Bob McLoud, Alaska Viceguvernør Byron Mallot.

De nordamerikanske, arktiske ledere inden paneldebatten. Fra venstre mod højreYukon Premier Sandy Silver, Nunavut Premier Paul Quassa, Naalakkersuisoq Suka K. Frederiksen, Northwest Territories Premier Bob McLoud, Alaska Viceguvernør Byron Mallot.

 

"Greenland Opportunities: Forging New Partnerships"-imi Naalakkersuisoq Suka K. Frederiksenip oqalugiarnera.

Naalakkersuisoq Suka K. Frederiksen under hendes tale til sessionen "Greenland Opportunities: Forging New Partnerships"

 

3. Naalakkersuisoq Suka K. Frederiksen Nunavunni naalakkersuisut siulittaasuat Paul Quassa peqatigalugu.

Naalakkersuisoq med Nunavut Premier Paul Quassa

 

 

Naalakkersuisoq Suka K. Frederiksen eqqarsartartoqatigiinni The Polar Initiativep pisortaa Mike Sfraga peqatigalugu

Naalakkersuisoq med Direktør for Polar-initiativet under tænketanken The Wilson Center, Mike Sfraga

 

 

Aallartitat Kalaallit Nunaata Washington, D.C.-mi Sinniisoqarfianeersut peqatigalugit saamaerlermit talerpimmut: Immikkoortortami pisortaq Jacob Isbosethsen, Aallartitaqarfimmi allatsi Rebecca Lynge, Naalakkersuisoqarfimmi Pisortaq Kenneth Høegh, Naalakkersuisoq Suka K. Frederiksen, Sinniisoqarfimmi pisortaq Inuuteq Holm Olsen.

 

Delegationen sammen med Grønlands Repræsentation i Washington, D.C. Fra venstre mod højre: Afdelingschef Jacob Isbosethsen, Ambassadesekretær Rebecca Lynge, Departementschef Kenneth Høegh, Naalakkersuisoq Suka K. Frederiksen, Repræsentaitonschef Inuuteq Holm Olsen.