Ullumikkut Masarsoqarfiit Ulluat

Ullumikkut – februaarip ulluisa aappaanni – Masarsoqarfiit Ulluat aamma Masarsoqarfiit pillugit isumaqatigiissut nalliuttorsiutigissavavut

Masarsoqarfiit pillugit isumaqatigiissut (Ramsar konventionen) nunanit tamalaaneersut isumaqatigiissutigaat, tamatumani immikkut “masarsoqarfiit nunanut tamalaanut immikkut pingaarutillit illersorneqarnissaat siunertarineqarpoq, ingammik timmissanut imarmiunut masarsoqarfiit”, kisiannili aamma pinngortitamut avatangiiserisamut aamma pingaaruteqarput. Masarsoqarfiit pillugit isumaqatigiissut masarsoqarfiit uumasoqarfissatut naasoqarfissatullu qitiutinneqarnissaannut tunngassuteqarpoq. Masarsoqarfiit pillugit isumaqatigiissummi aallaqqaammut timmissat imarmiorpassuit najortagaasa immikkut illersorneqarnissaat siunertarineqarpoq aamma Masarsoqarfiit pillugit isumaqatigiissutip atsiorneqarneraniit ulloq taanna malunnartinneqassaaq.

Nunarsuarmi tamarmi februaarip ulluisa aappaat nalliuttorsiutigineqartarpoq. Masarsoqarfiit tassaapput tatsit, kuunnguit, masarsoqarfiit, kuuit akui, kangerliumaninnguit, ikkannerit aamma imartat allat 6 meterit angullugit itissusillit. Masarsoqarfiit illersorneqartut ingammik tassaapput imarmiunik timmiaqarfiit nunanut tamalaanut pingaarutillit, tassami akuttunngitsumik timmissanit naluumasortunit tikinneqartarmata imaluunniit uumasunut naasunullu qaqutigoortunut uumasoqarfiullutillu naasoqarfiummata.

Nunatsinni masarsoqarfiit pillugit isumaqatigiissutikkut paarisassatut pisussaaffigisatsinnik masarsoqarfinnik aqqaneq-marlunnik peqarpugut. Tassa imaappoq masarsoqarfiit aqqaneq-marluk taakku tamarmik immikkut nalinginnaasumik tikinneqartarnissaat atorneqarnissaallu pillugit arlalinnik malittarisassaqartut. Malittarisassat ilaatigut siunissami kingulissatta masarsoqarfinnik aamma iluaquteqarnissaannik tamakkunanilu uumasoqassutsit naliitsuusut tamannginnissaannik siunertaqarput.

Nunatsinni masarsoqarfiit toqqarneqarsimasut aqqaneq-marluk taakku katillugit 13.000 km2-it sinnerlugit annertussuseqarput masarsoqarfiillu timmissanut imarmiunut soorlu nerlernernut pingaarnertut timmiaqarfiupput. Kisianni masarsoqarfimmit masarsoqarfimmut uumasut timmissallu assigiinngitsuusarput.
Masarsoqarfinnut aqqaneq-marluusunut taakkununnga malittarisassat Kalaallit Nunaanni masarsoqarfiit nunanit tamalaanit toqqarneqartut illersorneqarnissaat aamma timmissat imarmiut ilaasa illersorneqarnissaat pillugu Namminersorlutik Oqartussat nalunaarutaat nr. 12, 1. juuni 2016-meersumiipput. Nalunaarutikkut nunatsinni masarsoqarfiit nunani tamalaani inatsisilianit aamma masarsoqarfinnukarnissat tamakkuninngalu atuinissat pillugit malittarisassanit illersorneqarput. Piviusumik nalunaarummi qamutinik motoorilinnik angallatinillu ingerlaarnissat, illut, atortut allat aamma aalisarnerit nunalerinernillu pillugit malittarisassat aalajangersarneqarput.

Paasissutissanik amerlanerusunik pissarsiniarnissamut Pinngortitamut Avatangiisinullu immikkoortortaqarfimmi pisortaq, Karen Motzfeldt, +299 34 60 19-kkut imaluunniit e-mailikkut: karm@nanoq.gl,attavigineqarsinnaavoq.