Kalaallit Nunaanni suliffeqarfiit innuttaasunik ikiortarialinnik suliffissaqartitsisut pillugit ataatsimiinneq

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq sammisamut suliffeqarfiit innuttaasunik ikiortarialinnik suliffissaqartitsisut marlunngorpat ulloq 6. februaari 2018 nal. 16.30 Katuami soraarnerup nalaani ataatsimiisitsissaaq. Suliffeqarfiit innuttaasunik ikiortarialinnik suliffissaqartitsisut suunersut saqqummiunneqarnissaat aamma suliffeqarfiit innuttaasunik ikiortarialinnik suliffissaqartitsisut pilersinneqarneri Kalaallit Nunaanni qanoq siuarsarneqarsinnaanersut oqaaluuserineqarnissaat ataatsimiinnermi siunertarineqarpoq.

”Nunatsinni innuttaasut amerlavallaartut angerlarsimaffeqannginnermik allanillu atugarliornernik eqqugaapput. Taakkunannga aamma amerlasuut suliffeqanngillat inersimasunullu atugarliortunut naleqqussakkamik aaqqiissuteqarnissamut pitsaanerusariaqarpugut”, Naalakkersuisoq Sara Olsvig oqarpoq, nangillunilu:

”Suliffeqarfiit innuttaasunik ikiortarialinnik suliffissaqartitsisut tassaapput suliffeqarfiit nutaat immikkut nukittuffeqartut allatullu ittunik pissuseqartut; suliffeqarfiit innuttaasunik inuuniarnermikkut atugarliortunik tigusisinnaasut. Taamaalilluni suliffeqarfiit innuttaasunik ikiortarialinnik suliffissaqartitsisut innuttaasunut inuuniarnermikkut atugarliortunut annertuumik suliniuteqarsinnaapput. Innuttaasut tassaasinnaapput inuit timikkut tarnikkulluunniit innarluutillit, angerlarsimaffeqanngitsut, atornerluisut imaluunniit innuttaasut inuuniarnikkut pissutsinik allanik ajornartorsiuteqartut, nalinginnaasumik suliffeqarnermi toqqammaveqarnissamut ajornartorsiuteqartut”.

Kalaallit Nunaanni suliffeqarfiit innuttaasunik ikiortarialinnik suliffissaqartitsisut siuarsarnissaat siunertaralugu suliamik Naalakkersuisut aallartitsipput.

Soraarnerup nalaani ataatsimiinnermi eqqartuussissuserisoq Knud Foldschack aamma eqqartuussissuserisoq Line Barfoed sammisamut immikkut ilisimasallit, suliffeqarfiit innuttaasunik ikiortarialinnik suliffissaqartitsisut pillugit saqqummiussaqassapput: Suliffeqarfiit innuttaasunik ikiortarialinnik suliffissaqartitsisut sooq atorfissaqarnersut, qanoq pilersinneqarsinnaanersut nunanilu allaniit suut misilittagarineqarnersut.

Soraarnerup nalaani ataatsimiinneq ulloq 6, februaari 2018 nal. 16.30-18.15 Katuami Ikinngutigiit Inaanni ingerlanneqassaaq. 

Inersuarmiit apeqquteqarnissamut periarfissaqassaaq.

Kikkut tamarmik tikilluaqqusaapput.


Annertunerusumik paasisaqarusuttut Naalakkersuisup allattaagallartoq Upaluk Poppel oqarasuaat 53 93 71 atorlugu attaveqarfigisinnaavaat.