Inuit Pisinnaatitaaffiinut Kalaallit Nunaata Siunnersuisoqatigiivi nukittorsarneqassapput nammineernerulersinneqassallutillu

Ullut kingulliit Inuit Pisinnaatitaaffiinut Kalaallit Nunaata Siunnersuisoqatigiivinut inatsisissatut siunnersuut tusarniutigineqaqqammersoq sammineqarpoq.

Inatsisissatut siunnersuut avataaneersunit siunnersuisoqatigiillu namminneq nalilersuinerannik marlunnik tunuliaqutaqarpoq. Inatsisitigut allannguinissaq pisariaqartoq, Siunnersuisoqatigiit nukittorsarneqassasut nammineernerulernissaallu isumannaarneqassasoq taakku tikkuarpaat.

Inatsisissatut siunnersuut tusarniutigineqarsimasoq Siunnersuisoqatigiit aamma tikkuarsimasaannik assersuutigalugu ilaasortat ikinnerulernissaannik namminerisamillu allattoqarfeqalernissaanik imaqarpoq.

”Inatsisissatut siunnersuummik anguniagaq pingaarneq tassaavoq siunnersuisoqatigiit nukittorsarneqarnissaat nammineernerulernissaallu” Naalakkersuisoq Sara Olsvig taama oqaaseqarpoq nangillunilu ”tusarniaanermi akissuterpassuit nuannaarutigaagut, tassuuna takutinneqarmat siunnersuisoqatigiit suliaat soqutigineqartut taamaattumik aamma inatsisissatut siunnersuutip inaarutaasumik suliarinera tusarniaanerit tunuliaqutaralugit ingerlavoq. Uani soqutigisallit tusarniaanermut akissutaanni isornartorsiuinerit pingaarnerit isiginiarneqassapput”.

Tusarniaanermut akissutit tusaaniarneqarsimanerat assersuutissaqarpoq, inaarutaasumik inatsisissaq Naalakkersuisut siunnersuisoqatigiit siulittaasussaannik toqqaasassasut ilanngunneqanngilaq. Suleriaaseq maannamut atuuttoq ingerlatiinnarneqassaaq, tassalu siunnersuisoqatigiit nammineerlutik siulittaasussaminnik toqqasassapput. Tamatuma saniatigut tusarniaanermi tikkuarneqartut arlallit allat aamma naaperiuteqarfigineqassapput.

Paasisaqarnerorusukkuit Ministerimut allattaagallartoq Upaluk Poppel attavigiuk oqarasuaat 539371-imut