Issittumi suleqatigiinneq Naalakkersuisunut pingaarutilerujussuuvoq

Issittoq pillugu nunarsuarmioqatigiinni suleqatigiinneq Naalakkersuisunit suliassaqarfittut aalajangiisutut pingaarutilittullu inissisimavoq, Issittumilu Siunnersuisooqatigiit sumiiffinni suleqatigiiffiit pingaarnersaraat. Taamaattumik Naalakkersuisut suliassaqarfimmi tassani taamatullu issittumi ataatsimeersuarnerni annertusisamik suliaqarput.

Sapaatip akunnera 4-mi ukiumoortumik Arctic Frontiersimi ataatsimeersuarneq Tromsømi ingerlanneqarpoq. Ataatsimeersuarneq taanna Reykjavikimi ataatsimeersuarneq ilanngullugu issittumi ataatsimeersuartarnerit pingaarnersaraat. Ukiuni kingullerni Naalakkersuisut atorfilittatigoortumik peqataatitsiuaannarput. Ukioq manna Namminiilivinnermut, Nunanut Allanut Nunalerinermullu Naalakkersuisoqarfik suleqatigalugu Naalakkersuisoq issittumi suliassaqarfimmut attuumassutilik, atorfilittat peqatigalugit peqataapput.

Tromsømi Naalakkersuisoq Suka K. Frederiksen oqalugiartussatut qaaqqusaavoq, ajoraluartumilli tamatumunnga taamaatitsiinnartariaqarsimavoq Naalakkersuisut Politikkikkut Ataqatigiissaarineq pillugu Ilulissani januarip 24-anni 25-annilu ataatsimiimmata.

Ukioq mannaTromsømi Arctic Frontiersimi peqataasinnaannginnera uggornarpoq. Issittumi suleqatigiinneq annertuumik pingaartitaraara, Nunanullu Allanut Naalakkersuisuuffiup tiguneranit sapaatip akunneri marluk qaangiutiinnartut Alaskami Fairbanksimi Issittumi Siunnersuisooqatigiit Ministeriisa ataatsimiinneranni peqataallunga. Nunanut allanut tunngassutilinni atorfilittanit sisamaasunit Issittumi Siunnersuisooqatigiit pillugit marlunnik sullissisoqarpunga. Taakku saniatigut Naalakkersuisoqarfiit assigiinngitsut Issittumi Siunnersuisooqatigiit iluani suleqatigiinni arlalinni peqataatitaqarput. Politikkikkut ingerlatsinerup saniatigut suleqatigiinni taakkunani issittumi suleqatigiinnermi ingerlaasissaq inississorneqartarpoq.” – taama oqaaseqarpoq Naalakkersuisoq Suka K. Frederiksen.

Naalakkersuisooqatigiinnissami isumaqatigiissutip oqaasertaasa ilagaat Kalaallit Nunaata nunarsuarmioqatigiinni suleqatigiinnermi peqataatitaqartarnissaa. Tassuunakkut sukkulluunnit oqariartuutit kimittuut ersarissullu oqaatigineqartarnissaat anguniarlugu Naalakkersuisunit issittumi suleqatigiinnerup nukittorsarneqarnissaa anguniarlugu tamatigut arlaleriarlutik tapersersortarpaat.

Paasissutissanik annertunerusunik pissarsiaqarniarussi allaffimmi pisortaq Jacob Isbosethsen, +45 40402623 / +299 556772 atorlugit saaffigineqarsinnaavoq