Aatsitassanut Ikummatissanullu Naalakkersuisup Avannaata Kommunia Kommune Qeqertalillu ataatsimeeqatigai

Råstof

Aatsitassanut Ikummatissanullu Naalakkersuisoq sapaatip akunnera kingulleq Avannaata Kommunianut Kommune Qeqertalimmullu tikeraarpoq.

Aatsitassanut Ikummatissanullu Naalakkersuisup kommuninik politikikkut suleqateqarnermik patajaallisaarusunnera tikeraarnermi tunuliaqutaavoq, tassungattaarlu ilanngullugu aatsitassanut uuliamullu periusissiamik 2019-imit 2023-mut atuuttussamik suliaqarnermi kommunit akuutinneqarnissaat kissaatigineqarpoq.

Kommuninik ataatsimeeqateqarnermut atatillugu Naalakkersuisoq Múte Bourup Egede ima oqaaseqarpoq:

”Avannaata Kommunia Kommunillu Qeqertaliup angusaqarfiusumik ataatsimeeqatigineri nuannaarutigaakka. Aatsitassarsiornerup ineriartortinnerani kommunit isumaasa pilersaarutaasalu akuliunneqarnissaat Naalakkersuisut pingaartippaat. Aasitassarsiorlunimi inuussutissarsiornerup patajaatsup, inuussutissarsiutip pitsaasumik ineriartortinnissaanut inuussutissarsiummi tassani susassaqartut tamaasa pisariaqartippai.”

Kommune Qeqertalimmut tikeraarneq innuttaasunik ataatsimiititsinermik naggaserneqarpoq, tassanilu inuit 30-it takkupput. Aatsitassanut Ikummatissanullu Naalakkersuisup naalakkersuisut anguniagai, aatsitassarsiornermik ingerlatat killiffiat kiisalu naalakkersuisoqarfiup suleriaasia saqqummiuppai. Naalakkersuisut qanoq ilillutik aatsitassarsiortoqarnerani akileraarusiissutinik avammullu niuernermi qulakkeerinninnissaat, upalungaarsimanissamut pilersaarutit, avatangiisit il.il. pillugit innuttaasunit apeqqutigineqarlutik.

Aatsitassanut Ikummatissanullu Naalakkersuisup piffissami qaninnermi tullermi kommunit sinnerinut tikeraarnissani pilersaarutigaa.

Paasissutissat erseqqinnerusut pillugit uunga saaffiginnissinnaavutit: Naalakkersuisup allattaa Jane P. Lantz oqarasuaatikkut +299  59 79 09 imaluunniit e-mailikkut: japl@nanoq.gl