Naalakkersuinikkut Ataqatigiissaarisoqatigiit ataatsimiinneranni isumaginninnermik suliassaqarfik ukkatarineqartoq

Nunatsinni utoqqaat illui aamma najugaqaqatigiiffiit inunnut innarluutilinnut naleqquppat? Nunatsinni utoqqaat inuillu innarluutillit paaqqutarineqarnissaminnut isumassorneqarnissaminnullu sunik pisariaqartitsippat? Inersimasut atugarliortut suna ilisarnaatigisarpaat, matumani angerlarsimaffeqanngitsut kiisalu inuiaqatigiinni peqataanissamut atatillugu taakkua unammilligassat suut nalaattarpaat?

Sammisat taakku Naalakkersuinikkut Ataqatigiissaarisoqatigiit ataatsimiinneranni 24. Januar 2018-imi Ilulissani ingerlanneqartumi, ullormi sammisami saqqummiunneqarlutillu eqqartorneqarput.

Utoqqaat, inuit innarluutillit, inersimasut atugarliortut kiisalu meeqqat inuusuttullu pillugit suliassaqarfimmi sulisut arlallit ilisimasaminnik saqqummiipput.

Sara Olsvig, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq ulloq sammisaqarfik pillugu ima oqaaseqarpoq ”Iluarisimaaqaara, isumaginninnermik suliassaqarfik Naalakkersuinikkut
Ataqatigiissaarisoqatigiit ataatsimiinneranni matumani ukkatarineqarmat. Namminersorlutik Oqartussat kommunillu akornanni isumaginninnikkut suliniutinik, pitsaanerusumik ataqatigiissaarinissamut atugassarititaasunik pitsaasunik
pilersitsinissamut tamanna asseqanngitsumik periarfissiivoq. Innuttaasunut iluaqutaasussamik – isumaginninnermut suliassaqarfimmi suliniutigut iluatsissappata, ataqatigiissaarineq taanna pingaaruteqarluinnarpoq”.


Ulloq sammisaqarfik 25. januar Naalakkersuinikkut Ataqatigiissaarisoqatigiini oqallinnermik naggaserneqarpoq.

“Nuannaarutigeqaara Naalakkersuinikkut Ataqatigiissaarisoqatigiit ataatsimiinnissaanni tullermi innersuussutit arlallit akuerineqartussat suliarineqartussanngormata.
Oqartussaaffiit akimorlugit assigiinngitsunik suliallit suleqatigiinnissaasa annertunerusumik ukkatarineqarnissaa qitiutinneqassaaq, taamaalillutami unammilligassat tamakkerlugit eqqumaffigilissavagut,”
Sara Olsvig oqarpoq.

Naalakkersuinikkut Ataqatigiissaarisoqatigiinnut ilaapput Naalakkersuisut, borgmesterit tallimat kiisalu KANUKOKA-p siulittaasua. Taakkulu saniatigut KANUNUPE, Kalaallit Nunaanni Nunaqarfimmiut Peqatigiiffiat peqataavoq.

Annertunerusumik paasisaqarusukkuit naalakkersuisup allattaa, Nina Jul Larsen tlf: +299 539371-imut attavigiuk