Ilulissani innuttaasunik ataatsimiititsineq iluatsilluartoq

Naalakkersuisut marlunngornermi januaarip 23-anni Ilulissani innuttaasunik Majoriami ataatsimiititsimmata peqataajortorlutik takkuttut inuit 90-t missiliorlugit amerlassuseqarput.

Naalakkersuisut siulittaasuat Kim Kielsen aallarniilluni saqqummiinermini ilaatigut oqarpoq attaveqaqatigiinnikkut sanaartornissamik pilersaarutit eqqarsaatigalugit iliuuseqanngitsoornissaq attanneqarsinnaannavianngitsoq.

”Mittarfiliortiternissamut tunngatillugu assigiinngitsuniit uparuartorneqarpugut, taakkunannga oqaatigineqaqattaarpoq mittarfiliortiternissamik pilersaarutit aningaasaqarnikkut attanneqarsinnaangitsut. Naalakkersuisuni isumaqarpugut attanneqarsinnaanngitsoq tassaasoq uninngaannarluta iliuuseqannginnissarput, pissutsit takutippaat mittarfiit eqqarsaatigalugit pilersitsiortornissarput pisariaqartoq – illoqarfinni anginerusuniinnaanngitsoq aammali illoqarfinni mikinerusuni, Naalakkersuisut siulittaasuat Kim Kielsen oqarpoq.

Kim Kielsen Naalakkersuisullu tamarmik aallarniillutik saqqummiussereermata innuttaasut Naalakkersuisunut apeqquteqarnissaminnik periarfissinneqarput.

Ilaatigut ilinniarfinnik pisortallu suliffeqarfiutaannik Nuummiit nunatta sinneranut nussuinissamik pilersaarutit pillugit apeqquteqartoqarpoq.

Innuttaasut ilaannit apeqqutigineqarpoq Ilulissani talittarfeqarnikkut allilerinissamik Naalakkersuisut pilersaarteqarnersut, efterskolernissamut periarfissat taavalu aamma assersuutigalugu AFS aqqutigalugu nunanut allanukarsinnaanermut tapiissuteqartoqarsinnaaneranut tunngasunik qaammarsaasoqarnerunissaanik ujartuisoqarpoq. Aamma innuttaasut ilaannit apeqqutigineqarpoq paaqqinnittarfinni allanilu perorsaasussaaleqineq politikkerinit sooq taama eqqumaffigineqanngitsiginersoq, atorfiillu inuttaleruminaatsinneqartut inuttalersorneqarsinnaanissaat anguniarlugu perorsaasut akissarsiamikkut aaqqiivigineqarsinnaanerat tikkuarneqarpoq.

Aqqaluaq B. Egede akissuteqarnermini oqarpoq politikikkut akuliuttoqarsinnaanera misissorneqarsimagaluartoq, kisiannili taamaaliortoqassagaluarpat kattuffiit allat assingusumik pineqarnissaminnik piumasaqarnissaannik malitseqartussaassasoq, taamaaattumillu inuiaqatigiinnut akisoorujussuanngorsinnaasoq paasineqarsimasoq.

Naalakkersuisut Ilulissani innuttaasunik ataatsimiititsinerat Naalakkersuinikkut Ataqatigiissaarisoqatigiit, tassa Naalakkersuisunit borgmesterinit tamanit KANUKOKA-miillu peqataaffigineqartup, ulluni pingasuni isumasioqatigiinnertalimmik ataatsimiinnissaat sioqqullugu ingerlanneqarpoq.

Ilulissani innuttaasunik ataatsimiititsinermut tunngatillugu sukumiinerusumik paasisaqarusuttut saaffigisinnaavaat tusagassiisarnermik suliaqartoq Frederik Lund e-mailikkut: flun@nanoq.gl