”Proffesorip oqaatigisai akuersaarneqarsinnaanngilluinnarput”

Namminiilivinnermut, Nunanut Allanut Nunalerinermullu Naalakkersuisoq, Suka K. Frederiksen: ”Proffesorip oqaatigisai akuersaarneqarsinnaanngilluinnarput”.

Cataloniamiut namminiilivinnissamut angusaqarniarnerminni siuttuata Puidgemontip Danmarkimut tikeraarneranut atatillugu Marlene Wind, Københavnip Universititiani Institut for Statskundskabimi professori Savalimmiut nittartakkakkut tusagassiorfiannut kvf.fo-mut Danmarkip naalagaaffeqatigiinnerup iluani namminersortut pillugit oqaaseqarnermini ima oqaaseqarpoq:

Issuaaneq siulleq: ”…they are very poor, and we don’t actually care very much about them.”,
Issuaanerup aappaa: “They are not going to leave anyway, nobody believes that, they get so much money from us, they would go down the drain if they were ever to leave.”

Namminiilivinnermut, Nunanut Allanut Nunalerinermullu Naalakkersuisup, Suka K. Frederiksenip taama oqartoqarnera ima oqaaseqarfigaa: “Eqqarsarnarpoq professori EU-mut tunngasut immikkut sammisaqartoq, taama anneruniarpalaartigisumik pikkorinneruniarnermillu nipeqarluni eqqunngitsumillu Naalagaaffeqqatigiinnermi pillugit oqaaseqarfigisinnaammagu.”

Imalu nangippoq:

”Tupaallannaqaaq proffesori Danskit Kalaallit Nunaat pillugu qanoq soqutigisaqanngitsiginerannik oqaaseqarsinnaammat, oqaaserisaasalu takutippaat qanoq Kalaallit Nunaannut tunngasunut ilisimasaqanngitsiginini, taakkumi maluginiarneqareersutut aamma ilisimasaqarfiata avataaniipput.”

“Neriuutigaarput proffesorip taama isumaqarnera Københavnip Universititiata nalinginnaasumik pisortatigoortumik taamatut isumaqarfiginngikkaa, kalaallinik aamma ilisimatusarlutik ilinniartuutitaqarmata. Tamannami erngumanartoqarluinnassagaluarpoq.” Isummerpoq Naalakkersuisoq, Suka K. Frederiksen.

Linki: http://kvf.fo/netvarp/sv/2018/01/23/20180123foroyarerufatakoguttantydning

Annertunerusumik paasiniaaffissatut attavigineqarsinnaavoq immikkoortortaqarfimmi pisortaq, Natuk Lund Olsen oqarasuaat: 345412 e-mail: nlol@nanoq.gl