Nunalerinermi suleqatigiinneq nukittorsarneqartoq

Nunalerinermi suleqatigiinnerup nukittorsarneqarnissaa pillugu Naalakkersuisut Kommune Kujallerlu aallarniipput.

Nunalerineq pillugu imminut pilersornissap annertusarnissaata qulakkeerneqarnissaa, nutaamik eqqarsarnissaq innuttaasunullu qanilaarnissaq pillugit Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen Kommune Kujallermilu borgmester Kiista P. Isaksen suleqatigiinnerminnik nukittorsaapput. Suleqatigiinnerup nukittorsarneqarnissaa Suka K. Frederiksenip Kommune Kujallermi angalanerani ataatsimiinnerup kinguneraa.

”Nunalerinermut tunngassutilinni Naalakkersuisut Kommune Kujalliullu qanimut suleqatigiinnerat pingaarutilerujussuuvoq. Taamaattumik kommunimi siuarsaaneq inuussutissarsiornerlu pillugit inuussutissarsiornerup siunissaa nutaamillu eqqarsarneq pingaaruteqartoq pisariaqartorlu pillugit takorluukkat amerlasuut assigiissuteqarfigigatsigit pitsaasuuvoq. Kiista P. Isaksen Suka K. Frederiksenillu naqissuserpaat inuussutissarsiornerup ineriartornera imminut pilersornissamut Naalakkersuisut takorluugaannut qanimut ataqatigiittut”.

Ataatsimiinnermi ilaatigut nunalerinermi ingerlatsinerit nutaat oqaluuserineqarput. Tassunga atatillugu Kiista P. Isaksenip ilisimatitsissutigaa minkiuteqarnermut sumiiffimmi nutaatut suliniutigineqartoq.

Suka K. Frederiksen ima oqaaseqarpoq: ”Kommunimi inuussutissarsiornermilu nutaaliornermik ineriartortitsinermullu piumassuseqartoqarnera nuannaarutigaara. Savaateqarnerup pingaarnertut ingerlatsiviunera ingerlaannarpoq, taamaattorli suliniutigineqartut nutaat tapersersorneqarlutillu ineriartortinneqarnissaannut pitsaasunik sinaakkusiisoqarnissaa qulakkiigassaraarput, taamaalilluni nunalerinerup periarfissiissutai tamakkiisumik piviusunngortissinnaaniassagatsigit”.

Naggataatigut Nunaatillit, Kommune kujalleq, Naalakkersuisullu qanoq ulluinnarni sulinerminni suleqatigiilluarnerunissaat eqqartussallugu periarfissaqarpoq. Tassunga atatillugu innuttaasunut qanilaarnerusumik allaffissornikkut ingerlatsisoqarnissaa anguniarlugu pilersaarusiortoqarnissaanik Kiista P. Isaksenip Suka K. Frederiksenillu isumaqatigiipput.

Kiista P. Isaksenip Suka K. Frederiksenillu naqissuserpaat: ”Sumiiffinni innuttaasut atugaat aallaavigalugit suliat innuttaasunut attuumassutillit suliarineqartarnissaat qulakkeerneqassaaq. Taamaattumik allaffissornerup innuttaasunut qanilaarnerusumik ingerlannissaa isumaqatigiissutigigatsigu ajunngitsussap tungaanut alloriarneruvoq. Sumut saaffiginninnissat, malitassat suunersut allaffeqarfiullu tikikkuminartuunissaata ersarinnissaat pisariaqarpoq”.


Paasissutissanik annertunerusunik pissarserusukkussi attavigineqarsinnaavoq Naalakkersuisup allattaa Naasunnguaq Olsen, oqarasuaat 345414, e-mail: nasu@nanoq.gl