Kommune Kujallermi angalaneq iluatsilluartoq

Namminiilivinnermut, Nunanut Allanut Nunalerinermullu Naalakkersuisoq Suka K. Frederiksen iluatsilluartumik Kommune Kujallermi angalavoq

Naalakkersuisoq Suka K. Frederiksen Narsami innuttaasunik pisoqatigiisitsinertalimmik katersortarfimmi naapinneqarpoq. Aqaguanilu utoqqaat illuannut aammalu inuusuttut  ilinniaqqinnissaminnut piareersarfiannut Majoriamut pulaarluni. Taamatuttaaq Qaqortumi Kommune Kujallermi borgmesteri ataatsimeeqatigivaa kiisalu Nanortalimmi innuttaasunik ataatsimiisitsilluni. 

Utooqqaat ilaasa politikikkut qulaaninngaanniit aalajangiisarneq eqqarsarnatoqartippaat

Naalakkersuisup Utoqqaat illuannut pulaarneraniutoqqaat ilaat ima ilaatigut oqarpoq:

”Inuk sulisinnaatilluni sulissaaq. Imigassaq inuit namminneq ajortunngortittarpaat, ernumagaara Naalakkersuisut inunnut inersimasunut qulaaninngaanniit aalajangiinialeqinammata, uani assersuutitut taarusuppara imigassamut inatsisip aalajangiivigineqarnera, Naalakkersuisummi taamatut  pissuseqartassappata taanna namminiilivinnissamut siunertaqarnermut  tulluarsorinanngilaq.” Utoqqaat illuanni oqaatigineqartut ilaat imaappoq:

“Inuiaqatigiinni naleqartitat pingaaruteqarluartut ilagaat – inoqammut ataqqinninneq”

Naalakkersuisup Suka K. Frederiksenip Narsami Majoriami inuusuttut ilinniarfianni akisussaaffini pillugit saqqummeereernerata kingorna Namminiilivinnissaq pillugu inuusuttut assigiinngitsutigut soqutiginnillutik alapernaannerat malunnarluarpoq. Ilinniartullu Naalakkersuisumut apeqqutigisaat ilaatigut imaapput:

”Naalakkersuisuulluni qanoq ippa? Kalaallit oqaasii salliutinneqalissappat?Suliffissat ikinnerulissappat? Ilinniarsimasut qaqugu naammatsissappat? Præsidenteqalissaagut? Suut pingaartippigit? Namminiilivinneq qanoq isumaqartippiuk? Il.il.”

Naalakkersuisorlu ilaatigut ima akivoq:

”Namminiilivinnissami piginnittuusut tassaapput innuttaasut. Inummiippoq namminiilivinneq. Nammiliivinneq tassaavoq akisussaaffimmik tigusineq. Assersuutigineqarsinnaavoq angerlarsimaffik. Angerlarsimaffik inuup nammineq ilusilersortarpaa pingaartitani tunngavigalugit ilusilersortarlugu, illup iluata nammineq oqartussaaffiginissaa pingaartinneqartarluni, Namminiilivinneq aamma taamaappoq, nammineq pingaartitat tunngavigalugit ilusilersuineruvoq.Namminiilivinneq oqinnersiornerunngilaq. Innuttaasut aalajangissavaat qaqugu tamatuma pinissaa.”

Namminiilivinnermut Naalakkersuisoq Suka K. Frederiksen Narsamiit Qaqortumut ingerlaqqippoq Kommune Kujallermilu Borgmesteri Kiista P.Isaksen ataatsimeeqatigalugu. 

Suka K.Frederiksen kommune kujallermiborgmesteri Kiista P.Isaksen ataatsimeeqqatigaa

Naalakkersuisoq Suka K.Frederiksen Kommune Kujallermi borgmesteri Kiista P.Isaksenmarlunngorneq januaari 16-ani 2018 naapippaa. 

Naapeqatigiinnermi Borgmesterimit killiffimmi pisut saqqummiunneqarput taamatullu Naalakkersuisumit oqartussaaffigisat nassuiaatigineqarlutik. 

Naalakkersuisoq Borgmesterilu isumaqatigiipput namminiilivinnissamut suliniutit sumiiffinni innuttaasut qanimut tikillugit peqataatitsinissaq anguniarneqartariaqartoq, tassani pingaartinneqarluni Namminiilivinneq innuttaasut pigisassarigaat (takuuk immikkut tusagassiutinut nalunaarut).

Nunatta pissarititai inullu qitiutillugu 

Naalakkersuisoq Suka K. Frederiksen pingasunngornermi januaarip 17-ianni Nanortalimmut ingerlaqqippoq, innuttaasuniillu peqataaffigineqarluartumik ataatsimiisitsilluni.

”Namminiilivinnermut  piareersartoqarneranut kikkut tamarmik peqataasariaqarput nunattalu pissarititai atorluarneqartariaqarput” peqataasut oqarput. 

Peqataasulli ilaat namminiilivinnissamut apeqqusiisunik:

”Danmarkimut napparsimavissuarmut misissortikkiartortartut ima amerlatigipput allaat ullut tamaasa Danmarkiliartoqartarluni, namminiilivinneq atuutilerpat tamakkua qanoq aaqqinneqarsinnaappat? Namminiiliivinneq aarlerinartippara.”

Nanortalimmi innuttaasunik ataatsimiisitsinermi ataatsimut isigalugu amerlanerpaat Namminiilivikkusussusermik oqariartuuteqarput, aammalu tassunga tunngatillugu inuup qitiutinneqarnissaa pingaartinneqarluni:

”Inuit ataasiakkaarluta pilliuteqartariaqarpugut, tikkuinnarluta pisussat utaqqiinnarsinnaanngilaguttaamaammat tamatta iliuuseqartariaqarpugut. Uumasuuteqarneq nunalu kusanaqisoq takornarianut ornigarneqartussanngorlugu ineriartortinneqartariaqarput”, eqimattakkaaniit saqqummiisut ilaat ilaatigut taama oqarpoq.

Namminiilivinnermut Naalakkersuisup Suka K. Frederiksenip kujataani innuttaasunik ataatsimiisitsinini illuatungeriissumik pissarsiaqarfiulluartoq jannuaarip 18-iani naammassivaa, sinerissallu sinneranut suli ataatsimiisitsiartorfiginngisaminut ornigunnissani qilanaarilereerlugu, naggasiinermi oqaatigaa: “Namminiilivinnissamut sulineq politikkerinit kisimi ingerlanneqassanngilaq kisiannili innuttaasunit tiguneqarluni isummersorfigineqarluni pigineqassaaq

Annertunerusumik paasiniaaffissatut attavigineqarsinnaavoq immikkoortortaqarfimmi pisortaq, Natuk Lund Olsen oqarasuaat: 345412 e-mail: nlol@nanoq.gl

Majoriami Narsamiittumi innuttaasunik ataatsimiititsinermit

Narsami utoqqaat illuanni utoqqarnik ataatsimeeqateqarnermit