Piniartut puisit amiinik tunisisartut 1,5 mio. koruuninik bonusisissapput

Ukiut siulii assigalugit 2017-ip ingerlanerani Great Greenlandimut piniartunut puisit amiinik tunisaqartunut bonusimik akiliuteqartoqassasoq Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen aalajangiivoq.

Tassunga atatillugu Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoq Hans Enoksen imatut oqaaseqarpoq:

”Piniartut puisit amiinik tunisinerat bonusip akiliutigineratigut qujaniutigeqqissinnaanera assut nuannaarutigaara. Piniarnermik inuussutissarsiut tassaavoq kulturikkut kingornutatsinni pingaarutilittut ilaasoq, aamma piniarnermik kulturitta puisinillu piujuartitsisumik piniarnerput takussutissartaqartinnissaata qulakkeernissaa pingaartippara.”

2017-imut bonusit tamarmiusut DKK 1,5 mio.-iussapput, aammalu puisit amiinik tunisinermut tapiissutaasunut aningaasaliissutit tamarmiusut iluannit aningaasaliiffigineqarput.

Akiliuteqarneq piniartut ataasiakkaat tunisartagaat naapertorlugit annertussusilerlugit Great Greenland aqqutigalugu pissaaq. Akiliuteqarnissat sapaatip akunnerata takkuttussap ingerlanerani naammassinissaa naatsorsuutigineqarpoq.

Annertunerusumik paasisaqarusukkaanni attavissaq:
Naalakkersuisoqarfimmi pisortaq Jørn Skov Nielsen, Inuussutissarsiornermut, Suliffeqarnermut, Niuernermut, Nukissiuuteqarnermullu Naalakkersuisoqarfik email: jsn@nanoq.gl, telefon +299 34 56 34.