Pisinnaatitaaffik pisussaaffimmik malitseqarpoq

Namminiilivinnermut, Nunanut Allanut Nunalerinermullu Naalakkersuisup Suka K. Frederiksenip namminiilivinnissaq pillugu innuttaasunik oqallitsitsisarnini kingumut aallarteqqippai.

Namminiilivinnissamut aqqut naqissuserniarlugu pisoqatigiinneq siulleq Narsami januaarip 13-ianni pivoq. Ullormi tassani Narsaq issikkaluaqisoq innuttaasunik peqataalluartoqarpoq, pisoqatigeereernerullu kingorna katersortarfimmi oqallittoqarnerani innuttaasut namminiilivinnissaq pillugu oqallitsinneqarput:

“Siulitta inussuk aqqutissiuisutut tunaartarisarpaat, 1979-mi inussuk inuiaat kalaallit aqqutissaannut ikkuteqqaarneqarpoq aappassaanik 2009-mi inussuup aappaa aqqutissap tullianut ikkunneqarpoq, inuiaallu piginnaanimikkut ineriartuinnarnerat ilutigalugu aqqutissami inussuit amerliartussapput.”
Taamak oqarpoq Narsami innuttaasut ilaat Peter Larsen.

“Namminiilivinnissaq angujuminaappoq kivitseqatigiinngikkutta. Naleqartitagut pingaartitagullu tunaartaralugit kivitseqatigiikkutta, angorusutaq anguneqarsinnaavoq”. Narsami innuttaasup ilaat taama oqarpoq.

“Nunatta pissarititaanik atuineq pikkorluffigivallaarparput. Piumaqasarluta nilliarnerusariaqarpugut.” Aamma innuttaasut akornanni oqaariatuutigineqarpoq.

Oqallinnerup ingerlanerani tikinneqartut arlaqarput ilaatigut aatsitassarsiorneq, sakkulersunngikkaluarluni namminiilivinnissamut ornigunneq, qimoqatigiilluni pingaaruteqassusaa, kajumissuseq aallaavigalugu suleqatigiinnissaq, minnerunngitsumillu aqqutseriaatsip inuiaqatigiinnut tulluarsarneqarnissaa.

Oqallinneq uummaarissoq naggaserlugu Namminiilivinnermut naalakkersuisoq Suka K. Frederiksen ima oqarpoq:

“Inuiaqatigiit namminiilivinnissap imassaa immigassaraat, Naalakkersuisullu sinaakkusiissapput, eqqaamaneqartariaqarporlu inuiaqatigiittut naleqassuseq aallaavigalugu piumasaqarsinnaasariaqaratta. Sussassareqatigiinneq siulitta nukittuffigisaat nukittorsarneqaqqippat kivitseqatigiinneq oqinnerussaaq.”

Annertunerusumik paasiniaaffissatut attavigineqarsinnaavoq immikkoortortaqarfimmi pisortaq, Natuk Lund Olsen oqarasuaat: 345412 e-mail: nlol@nanoq.gl