Qaqortumi Blok J-imi ikuallattoqarnerani ajoqusernerit

Qaqortumi Blok J-imi ikuallattoqarnera pillugu Inissiaatileqatigiiffik INI A/S-imit ilisimatitsissut, najugaqartut tamarmik piffissaagallartillugu annaanneqartut aammalu ajoqusertoqarsimanngitsoq pillugu ilisimatitsissut ilanngullugu, ikuallattoqalernerata kingunitsianngua Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfiup tiguaa. Tamatuma kingorna najugaqartut inissinneqarnissaannut tunngatillugu suliniarneq aammalu ajoqusernerit paasinarsisinneqarnissaat siunissamilu illuummut tassanilu najugaqartut pillugit suliaqarneq Naalakkersuisoqarfik INI-imit ingerlaavartumik ilisimatinneqartarpoq.

Blok J katillugit 32-inik inissiartaqarpoq, taakkunani juullinngitsiartoq ikuallattoqalermat taamaallaat 16-it najugaqarfigineqarlutik. Attartortut 7-it toqqaannartumik ikuallattoqarnerani sunnerneqarput, aammalu inissiani utaqqiisaasumik ingerlaannaq inissinneqartariaqarsimallutik. 3., 4. aamma 5. sal imaarneqassasut juullip ukiortaallu akornanni INI-p aamma Naalakkersuisoqarfiup Kommune Kujallermi ikuallattoornissamut oqartussanit peqqusissut tiguaat, tassami majuartarfiup aappaata matuneqarnerata kingunerisaanik qimaaffissaq ungasippallaalersimammat. Majuartarfik pineqartoq tassaavoq majuartarfik ikuallattoq, taassuminngalu iluarsaassineq sivisuumik ingerlanneqartariaqartussaassalluni.

Taamaattumik Naalakkersuisoqarfik INI qanimut suleqatigalugu peqqussuteqarnerup naammassineqarnissaanut piaartumik suliniutinik aallartitsivoq. Naalakkersuisoqarfik INI suleqatigalugu inissiattaakkua, illoqarfimmi Namminersorlutik Oqartussat ineqarfiiniittut ukiup aallartinnerani sapaatit akunneranni siullermi misissorpai. Tamatuma kingorna isumaqatigiissutigineqarpoq inissiat taakkua, ilaqutariinnut Blok J-imit anisussanut inissiatut taartissatut atorneqarsinnaasut, iluarsaanneqarnissaannut INI immikkut ittumik suliniuteqassasoq.

INI inoqutigiinnut kalluarneqartunut taakkununnga inissianik taartissanik isumannaarisinnaassasoq Naalakkersuisoqarfik naliliivoq.

Peqatigisaanik Blok J-ip isaterneqarnissaata siuartinneqarnissaa, iluarsaassinissamit naleqqunnerussanersoq, Naalakkersuisoqarfiup misissorpaa. Tamatumani pingaartumik inissiarsuarmiittut inoqanngitsorpassuit tunngaviupput ajoqusernerit ikuallannermit pissuteqartut, kiisa inissiarsuup pitsaassusaata pitsaannginnera pissutaalluni. Inassuteqaatit Namminersorlutik Oqartussat suliassaqarfimmut pilersaarutaani Qaqortumi allassimasut tassunga ilanngutissapput, tassani inassutigineqarpoq ukiut 5-10 iluanni Blok J isaterneqassasoq.

Ilanngullugu paasissutissiissutigineqarsinnaavoq inissaaleqisoqarnera tunngavigalugu, Suliassaqarfimmut pilersaarutip nutarterneqarsinnaanissaa siunertaralugu, illoqarfimmi illuutit Namminersorlutik Oqartussat suliassaqarfimmut pilersaarutaani Qaqortumi isaterneqartussatut inassutigineqartut, misissorneqarmata. Taamaalilluni illuutit siunissami illuutinik atorneqarnerisa sivitsorneqarnissaanut taamaalillunilu iluarsaanneqarnissaannut Namminersorlutik Oqartussat pilersaarutaanni siunissami ilaatinneqarsinnaassallutik. Naalakkersuisoqarfiup sulissutigaa tamatuma inaarutaasumik paasinarsisinneqarnissaa, taamaattumik Qaqortumut suliassaqarfimmut pilersaarutip nutarterneqarnissaa naatsorsuutigineqarluni. Nutarterinermi tassani inissiat arlallit iluarsaanneqartariaqassapput (pingaartumik Illoqarfiup qeqqani), tassani suliassat taakkua suliarineqarnerat pillugu INI qanimut suleqatigineqassasoq naatsorsuutigineqarluni, iluarsaassinerit 2018-ip aallartinnerani aallartinneqarsinnaaleriissasut naatsorsuutigineqarluni.

Aammattaaq ilisimatitsissutigineqarsinnaavoq ineqarnermut suliassaqarfimmi iluarsaaqqinnernik suliaqarneq ingerlammat. Tamatuma kingunerisaanik Namminersorlutik Oqartussat inissiaataasa kommuninut 1.1. 2019 tunniunneqarnissaat sulissutigineqarpoq. Taamaattumik Namminersorlutik Oqartussat ineqarnermut suliassaqarfimmut aningaasaliissutaat tamarmik 2018-imi iluarsaassinissanut isaterinissanullu immikkoortinneqarput.

Naggasiutigalugu ilisimatitsissutigineqassaaq, Naalakkersuisoqarfiup ajoqusernerit sunniutigisassai INI suleqatigalugu nalilersuleruttormagit, kiisalu isaterinerup sapinngisamik sukkanerpaamik ingerlanneqarnissaa qulakkeerniarlugu suliniutit suut ingerlanneqassanersut paasinarsisissallugu, taamaalilluni inissiarsuaq isumannaallisaanermi aarlerinartorsiortitsisutut inissisimaannassanani.

Matuma siuliani allassimasut pillugit apeqqutissaqartoqaruni, tamanna pillugu Najugaqarfinnut Illuutinullu immikkoortortaqarfimmi pisortaq Embla Kristjánsdóttir – emki@nanoq.gl – saaffigeqquneqarpoq.