Ilinniarfinnik nuussinissat

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Doris J. Jensen-ip matumuuna uppernarsarsinnaavaa Saviminilerinermik Ilinniarfiup Sisimiunut nuunneqarnissaanik aamma Eqqumiitsuliornermik Ilinniarfiup Aasiannut nuunneqarnissaanik suliat ingerlaqqissasut.

 

Naalakkersuisut 2017-imi aalajangerput ilinniarfinnik illoqarfinnut allanut Nuup avataaniittunut nuussinissat Naalakkersuisut anguniagaanni qitiusumik inissisimasut. Tamatumani siunertaavoq nukinnik aamma periarfissanik nunatsinni sumiiffinni assigiinngitsuniittunik iluaquteqarnissat, ilutigisaanillu ineriartortitsinermik suliffissanillu pilersitsisarnissat. Anguniagaq taanna anguneqarsinnaaqqullugu 2017-imi aallartinneqarput suliniutit arlallit, qulaajarumallugu ingerlatsiviit suut iluaqusiisumik allanut nuunneqarsinnaanersut.  

 

Siullermik iliuutsini nuussinissamut siunnersuutit sisamat nalilersuiffigineqarput uuttuutit assigiinngitsut atorlugit, tamatumani aamma aningaasarsiornermut aamma sulisussaqarniarnikkut nuussinerup kingunerisassai. Isumaliutersuutinilu aamma ilaasimavoq nuussinerit nunamut tamarmut aammalu kommunini immikkoortunut pilersaarutaasut killiliussaasa iluini pisarnissaat. Nuussinissanut siunnersuutit sisamaasut tassaasimapput Saviminilerinermik Ilinniarfiup Sisimiunut nuunneqarsinnaanera, Niuernermik Ilinniarfiup (NI-Nuuk) Qaqortumut nuunneqarsinnaanera, Isumaginninnermi siunnersortitut ilinniartitaanerup Ilulissanut nuunneqarsinnaanera aammalu Eqqumiitsuliornermik Ilinniarfiup Aasiannut nuunneqarsinnaanera.

 

Tunngavilersorluagaasumillu aalajangiinissamut tunngavissat suliarineqarsimasut aallaavigalugit Naalakkersuisut maanna aalajangerput suliat ingerlatseqqinneqassasut, Saviminilerinermik Ilinniarfiup Sisimiunut nuunneqarnissaanik suliamik allaaserinninneq aamma Eqqumiitsuliornermik Ilinniarfiup Aasiannut nuunneqarnissaanik allaaserinninneq suliaralugit. Tamatuma saniatigut kissaataavoq niuernermi ilinniartitaanerit ineriartorteqqinneqarnissaat, assersuutigalugu IT-mik ilinniartitsineq Campus Kujallermi.

 

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris J. Jensen nuussinissanut atatillugu imaattunik oqaaseqarpoq:  ”Naalakkersuisut ilinniartitaanerni nuunneqartussani ineriartortitsinissamut periarfissat takusinnaavaat. Uanga tunginniit piumasaqaataasimavoq nuussineq ilinniarfimmut iluaqusiisinnaassasoq, maannalu naliliisoqarsimalerpoq aningaasarsiornikkut aamma ilikkagassat tungaasigut ilinniakkanik pineqartunik nuussinissat iluaqutissartaqartut. Taamaattumik qilanaaraakka sunniutaasussaajumaartut takunissaat, ilinniarfinnik taakkuninnga nuussinerit ilinniartitaanerni kinguneriumaagaat, ilutigisaanillu kommunit qutsavigiumavakka suleqatigiinnermut pitsaasumut”.         

 

Annerusumik paasisaqarniaraanni Naalakkersuisup allattaa Rosa Thorsen +299 553303 attavigineqarsinnaavoq.