Tunngaviusumik Inatsisissaq pillugu Isumalioqatigiissitamut akissut

Namminiilivinnermut Nunanut Allanut Nunalerinermullu Naalakkersuisup Suka K. Frederiksenip Tunngaviusumik Inatsisissaq pillugu Isumalioqatigiissitap januaarip tallimaanni 2018 tusagassiuutinut nalunaarutaa imaattumik akissuteqarfigaa

Tunngaviusumik Inatsisissaq pillugu Isumalioqatigiissitap januaarip tallimaani 2018 tusagassiutinut nalunaarutaa aammalu tusagassiutit tamanna pillugu tusagassiinerat pillugit pineqartumut akisussaasutut Naalakkersuisutut imatut oqaaseqarfigerusuppara:

”Tunngaviusumik inatsisissaq pillugu Isumalioqatigiissitap suliakkiissutinut najoqqutassiami ilaatigut imaattumik allassimasoqarpoq:

“Inatsisartut aamma Naalakkersuisut aalajangerpaat isumalioqatigiissitaq pilersinneqassasoq Tunngaviusumik Inatsisissamik suliaqartussaq. Tunngaviusumik inatsisissamut siunnersuut Tunngaviusumik Isumalioqatigiissitap suliarissavaa, suliarlu naammassippat saqqummiunneqassalluni.
Isumalioqatigiissitap politikkikkut katitigaanera sapinngisamik partiinik tamani sinniisuuffiunissaa kissaataavoq. Tunngaviusumik inatsisissamut siunnersuummik suliaqarnermi Nunarput pillugu ilisimasaqartut aamma ilisimasatigut piukkunnaateqartut ilaatinneqassapput.”

Isumaqatigilluinnarpara Isumalioqatigiissitap sulinini nammineerluni aaqqissorusummagu. Isumalioqatigiissitamili siulersuisoqatigiit akerliunini toqqarmagu una tunngavigalugu sulinertik unitsinneqassasoq, taavalu sulinnginnertik ingerlatiinnarniarpasitsillugu tamanna tunngavissaqarsorinanngilaq taamalu Inatsisartut Naalakkersuisullu aalajangiussaannut kissaataannullu tamanna akerlianik iliornertut paasineqartariaqarluni. Isumalioqatigiissitami ilaasortat partiiminniit toqqagaanertik tunngavigalugu ilaasortaapput, taamaattumik Isumalioqatigiissitami siulersuisoqatigiit taakku taamatut toqqagaasimanerat aalajangersaavigisinnaanngilaat.

Isumalioqatigiissitami siulersuisoqatigiit suliakkiissutigineqartut suliarisarissavaat, tassaasullu Tunngaviusumik Inatsisissaq suliarissallugu suliakkiissutinut najoqqutassiaq tunaartaralugu. Tassalu taannaavoq sulinermi tunngaviusussaq atorneqartussarlu Naalakkersuisut allatut aalajangernissaasa tungaannut.

Ajuusaarnarpoq, tusagassiortunut nalunaarutigineqartumi paasillugu sammisat najoqqutassiap avataaniittut arlallit Isumalioqatigiissitap nassuiarsimammagit.

Ajuusaarnarluinnarpoq, Inatsisartut Naalakkersuisullu suliakkiissutigisaat aalajangiussaallu suliassatut aallunneqannginneri. Siulersuisoqatigiit tusagassiutinut nalunaarutaani paasivara suliassamut aallussineq Tunngaviusumik Inatsisissamut najoqqutassiaq aallaavigalugu suliassaq ukkatarineqanngitsoq.

Decembarip 11-ani 2017 Isumalioqatigiissitaq sakkortunerpaamik kaammattorpara tunngaviusumik inatsisissaq pillugu sulinera nangeqqullugu, massakkullu paasillugu kaammattuineq Isumalioqatigiissitamit soqutigineqarsimanngitsoq, tamannalu akisussaasutut Naalakkersuisutut iliuuseqarfiginiarlugu. Tunngaviusumik Inatsisissami suliaqartoqarnera qulakkeerneqartariaqarpoq, taamaattumillu pisinnaatitaaffigitinneqartut iluanni pisarialimmik aalajangiutoqartariaqarpoq.”

 

Annertunerusumik paasiniaaffissatut attavigineqarsinnaavoq Naalakkersuisup allattaa Naasunnguaq Olsen oqarasuaat: 345414 e-mail: nasu@nanoq.gl