Avatangiisit Pinngortitarlu pillugit 2017-imi Nersornaat aappaa Qasigiannguani tunniunneqarpoq

Pinngortitamut eqqakkanik ukiuni 50-ini katersisarsimanerit – Kalaallit Nunaanni Avatangiisit Pinngortitarlu pillugit Nersornaat 2017 ukioq´manna Qasigiannguarmiumut piumassuseqarluartumut tunniunneqarpoq

Ullumikkut Avatangiisit Pinngortitarlu pillugit Nersornaat Minna Brandt Møllerimut, Qasigiannguit, tunniunneqarpoq.

Ullormi Avatangiisit Pinngortitarlu pillugit Nersornaaserneqartoq Minna Brandt Møller, ukiorpassuarni avatangiisinik saligaatsuutitsiniarnini pillugu nersornaaserneqarpoq. 1970-kkunniilli Minna Brandt Møller qasusuilluni Qasigiannguani pinngortitamilu eqqagassarpassuarnik katersisarsimavoq. Minna aamma inunnik avatangiiserisaminik ingammillu illoqarfiup meerartaannik isummersuillaqqissutut nersorniarneqarpoq. Taamaalilluni Minnap inersimasut meeqqallu eqqakkanik katersisarnissaannik kaammattortuaannarsimavai aamma nammineq ukiuni 50-ingajanni maligassiuisuulluni assersuutitsialaasimavoq. 

Avatangiisit Pinngortitarlu pillugit Nersornaat Naalakkersuisut sinnerlugit Qaasuitsup Kommuniani borgmesterimit Ole Dorphimit tunniunneqarpoq.

Namminersorlutik Oqartussat Avatangiisit Pinngortitarlu pillugit Nersornaasiuttagaat inunnik, pisortat suliffeqarfiutaannik suliniaqatigiiffinnilluunniit maligassiuisutut nunami innuttaasunik pinngortitamik avatangiisinillu ilisimasaqarnerannik qaffassaaqataasut imaluunniit suliniuteqarnermikkut Kalaallit Nunaanni avatangiisinik pinngortitamillu suliniuteqartuarnermikkut pitsanngorsaaqataasut nersorniarneqartarput. Ukioq´manna Pinngortitamut Avatangiisinullu Naalakkersuisoqarfimmit suliffeqarfiit, suliniaqatigiiffiit inuilluunniit ataasiakkaat eqqakkanik amerlaqisunik immikkut ittumik katersisartut eqqakkanillu akiuiniartartut inassuteqaatigineqarnissaat kaammattuutigineqarsimavoq.

Avatangiisit Pinngortitarlu pillugit Nersornaammut aningaasat 25.000 koruunit ilaatinneqarput, taakkulu 2017-imi tunniunneqassapput. Benjamin Adolfsen, Qaqortoq, novembarip naanerani siulliulluni nersornaaserneqarpoq.

Paasissutissanik amerlanerusunik pissarsiniaraanni attaveqarfigineqartussat:

Nalaakkersuisut Siulittaasuata allattaa, Nuka Møller, tlf.: 562450, email: nume@nanoq.gl

Immikkoortortaqarfimmi pisortaq, Karen Motzfeldt, tlf.: 346019, email: karm@nanoq.gl