Karl-Kristian Kruse KNAPK-mut: Akisussaaqataaniaritsi

Henrik Sandgreen, KNAPK-ip aqutsiveqarfiit tamarmik immikkut 10.000 tonsinik ukiuni tulliuttuni marlunni qaleralittassinneqarnissaannut siunnersuutaa Naalakkersuisunit akuerineqarsimasuuppat, tamanna akisussaassuseqannginnerarlugu oqassagaluarnerpit.

Taama Aalisarnermut Piniarnermullu Naalakkersuisoq, Karl-Kristian Kruse, KNAPK-ip siulittaasuata Henrik Sandgreenip aqutsiveqarfinnut Qeqertarsuup Tunuani, Uummannami Upernavimmilu qaleralittassiissutinut isornartorsiuineranut akissuteqarluni oqarpoq. 

KNAPK-ip siulittaasua Henrik Sandgreen internetsikkut nutaarsiassaqartitsivimmut Sermitsiaq. AG-mut decembarip 21-anni 2017-imi ilaatigut oqarpoq: ” Sinerissap qanittuani qaleralinniarneq Naalakkersuisunit ulorianartorsiortinneqarpoq. Nuanninngitsumik aalajangertariaqarneq takkukkumaarpoq, tamannalu aalisartut malugissaqqaarpaat.”

Matumuuna erseqqissaatigerusuppara Naalakkersuisut nuanninngilluinnartunik aalajangiisimassagaluarmata KNAPK-ip 2018-imi TAC-issat pillugit tusarniummut akissutaani pisassiissutinik 10.000 tonsinik kammattuineratuut aalajangiisimagaluarpata. 

KNAPK-mi ima allappoq: “KNAPK-mit matumuuna aalisarnermik piniarnermillu pisortaqarfik kajumissaassavarput aqutsiveqarfinnut; Upernavik, Uummannaq aamma Qeqertarsuup Tunuanut pisassiissutissatut ukiumut tamarmik immikkut 10.000 tonsinik aalajangeqqullugit.”

Ilumullimi taama amerlatigisorsuarnik ilasineq akisussaassusilimmik pissuseqarnerunerpa? 

Uggorilluinnarpara ilaasortatit aalisapiluttuunerarlugit tikkuartortarakkit. Isumaqarpunga ilaasortannut ataqqinnerunerusariaqartutit,  taakkuummata aasaappat ukiuuppalluunniit pinngortitami peqqarneeqisumi inuussutissarsiortut.

Isumaqartuarpunga qalerallit aalisapilunneqaratik silaannaap allanngornerata nassataanik akullaraluttuinnartut.   

Isumaqarpunga pisortat pisussaaffigilertariaqaraat silaannaap allanngornerata sunniutai pillugit sukumiisumik misissuisoqartariaqartoq.

Saarulliit 8.000 tonsit

Ilumoorpoq Qeqertarsuup Tunuani qalerallit maannamut tunineqartut ukiut siuliinut sanilliullugit 4.000 tonsinik ikinnerummata.  

Ilisimatissavagit Qeqertarsuup Tunuani aalisartut aatsaat taama amerlatigisunik ukioq manna saarullimmata, tunisaat 8.000 tonsinik ikinnerunatik.

Ilulissanut aalisartunik sapaatip akunnerani kingullermi oqaloqatiginnikkiartorninni aalisartut ilaata oqaluttuaa matumuuna issuassuara.  

“Malunnartumik qalerallit aalisarneqartartut pisarnertut ikinnerupput. Malugisinnaavarput Qeqertarsuup Tunuata sarfaa kissarnerulersimammat qalerallit ikileriarlutik. Qaleraliimmi nillertumi aalisagaapput. Ilisimaarilluinnarparpullu imaq nillertikkaangat qaleraleqarnerulersartoq. 

Taamaattumik Qeqertarsuup Tunua ukioq manna saarulleqarneruvoq. Aalisagaararpassuit aamma siornatigut taama amerlatigisut takuneq ajukkagut siumortarpagut, taakku saarullinnit ilaatigut nerisaasarlutik. 

Ilumoorporlu Qeqertarsuup Tunuani qaleraleqassusseq ukiuni kingullerni allanngorsimammat.“

Pitsaanerusumik misissuisoqarli

Isumaqatigisinnaakutsoorpakkit 2018-imi TAC-issat pillugit tusarniummut akissutissinni allakkassi uumassusilerinikkut misissuinerit annikinnerujussui ernumanarnerarlugit.  

Taamaattuminguna Naalakkersuisut ukiut siuliinitulli qaleralittassiisut,  isumaqaramik qaleraleqassutsinut misissuinerit naammaginanngilluinnarmata.

Naalakkersuinermik suliaqartuusugut innuttaasut pitsaanermik atugassaqartinneqarnissaat siunertaralugu suliaqartarpugut. Pereersut ilinniarfigineqartarlutik. 

Kissaatigaara aalisartut kattuffii qaleralinniarnerup nutaamik aaqqissuuteqqinneqarnissaa pillugu ukiortaami suleqatigilluarumaarlugit.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq Jørgen Isak Olsen. Email: jio@nanoq.gl