Aalisartut piniartullu aningaasaateqarfinnit nersorneqarput

Fiskefartoej Carl Egede aningaasaateqarfiata aamma Augo Lyngep aningaasaateqarfiata aalisartut piniartullu tallimat ullumi ullukinnermi decembarip 21-anni nersornaaserpai.
Nersornaatit marluk aalisartunut piniartunullu tunniunneqarput, ataaseq aalisartunut piniartunullu eqqaassutissaannut, ataaserlu ajunaarsimasumut nuliaasumut.
Nersornaatit kommunit nunaqarfiillu allaffiini tunniunneqarput.

Nersornaaserneqartut allagartamik 5.000 aamma 6.000 koruuninik aningaasartalimmik tunniunneqarput.

Uku Carl Egedep aningaasaateqarfianit nersornaaserneqarput:
  • Aqqalunnguaq Tobiassen, Qaarsut – 6.000 koruunit
  • U.K.A.P.P, Upernavik Kujalleq, eqqaassutissaq – 5.000 koruunit
  • Søren Noahseniugaluamut ujarattaliineq, Qaqortoq - 5000 kroner
  • Ellen Kielsen Noahsen, Søren Noahseniugaluup nulianut, Qaqortoq – 6.000 kroner
Una Augo Lyngep aningaasaateqarfianit nersornaaserneqarpoq:

• Svend Peter Petersen, Uummannaq – 6.000 koruunit

Aalisartut piniartullu peqatigiiffii nersornaaserneqartussanik kommunalbestyrelsinut innersuussaqartarput, kommunalbestyrelsit innersuunneqarsimasut akuerisarpaat aningaasaateqarfimmullu ingerlatitseqqittarluni.
Carl Egedep Aningaasaateqarfiata siunertaraa ikiorsiisarneq inunnut nunatsinni najugaqartunut tassaniluunniit najugaqarsimasunut ukuusunut:
1. Aalisartut piniartullu ajunaarsimasut kinguaavinut,
2. aalisartut piniartullu inuutissarsiornermi maligassiuisunut,
3. aalisartunut piniartunullu utoqqanngortunut,
4. aalisartunut piniartunullu inuutissarsiorlutik ajoqusertunut,
5. aalisartutut piniartutullu inuutissarsiornermi maligassiuisuusimasut toqusut eqqaassutissaannut,
6. immikkut pissutissaqartillugu aalisartut piniartullu, pingaartumik inuusuttut, aningaasaateqarfiup siulersuisuisa isumaat malillugu ikiorserneqarsinnaapput.
Augo Lyngep Eqqaassutissatut Aningaasaateqarfiata siunertaraa Inuusuttunut Kalaallit Nunaanni najugalinnut aalisarnerup piniarnerup savaateqarnerulluunniit iluani immikkut ittumik soqutiginninnermik, eqiasuissusermik suliniarluarsimanermillu takutitsisunut nersornaasiinissaq.

Carl Egedep Aningaasaateqarfiata aamma Augo Lyngep aningaasaateqarfiata siulersuisui, tassaasut Aalisarnermut Piniarnermullu Naalakkersuisoq, Karl-Kristian Kruse aamma KNAPK-ip siulittaasua, Henrik Sandgreen, decembarip 11-anni 2017-imi ataatsimiinnerminni aalisartut piniartullu utoqqalisut aamma aalisartutut inuutissarsiornermi maligassiuisutut nersorneqartussatut innersuunneqartut aalajangersaaffigivaat.

Attavigineqarsinnaapput Aalisarnermut Piniarnermullu Naalakkersuisoqarfimmi atorfillit Niels Lyberth Email: nily@nanoq.gl imaluunniit Johanne Jeremiassen Email: jjer@nanoq.gl