Tuttunniarnissamut piffissaliussat pisassiissutillu - Ukiuunera 2018

Matumuuna ukiuunerani 2018-imi tuttunniarnissamut piffissaliussat aamma tuttutassiissutit nalunaarutigineqarput. Ukiuni arlalissuanngortuni tuttunik pisortatigoortumik kisitsisoqarnikuunnginnera pillugu Pinngortitaleriffimmiit siunnersuisoqanngilaq. Maannakkut aatsaat Piniarfik 2-mi – Sisimiut-Kangerlussuaq – aamma Piniarfik 3-mi – Akia-Maniitsoq – ukiuunerani 2018-imi tuttunik kisitsisoqarnissaa Pinngortitaleriffimmiit pilersaarutigineqarpoq tamannalu pillugu ukiuunerani tuttunniarneq taamaallaat 15. februaari 2018 ilanngullugu ingerlassaaq.

Tuttut

1.       Ukiuunerani inuussutissarsiutigalugu tuttunniarneq piniarfinni makkunani piffissami 1. februaarimiit 2018-imi 15. februaari ilanngullugu ingerlassaaq:

      Piniarfik 1 - Naternaq - Tuttutassiissutit 100-t.

       Piniarfik 2 – Sisimiut-Kangerlussuaq – Tuttutassiissutit 200-t.

       Piniarfik 3 – Akia-Maniitsoq – Tuttutassiissutit 200-t.

Piniarfik 4 – Ameralik – Tuttutassiissutit 100-t.

Piniarfik 5 – Qeqertarsuatsiaat – Tuttutassiissutit 100-t.

Piniarfik 6 – Qassit – Tuttutassiissutit 100-t.

Piniarfik 7 – Neria – Tuttutassiissutit 100-t.

Piniarfik 8 – Nuussuaq – Tuttutassiissutit 100-t.

Tunngavilersuutit: Piniarnermut Naalakkersuisoq aalajangerpoq Piniarfik 1-imi, 2-mi, 3-mi, 4-mi, 5-imi, 6-imi, 7-imi kiisalu 8-mi killilimmik ukiuunerani inuussutissarsiutigalugu tuttunniartoqassasoq tamannalu politikkikkut aalajangiinerulluni. APN-ip kommunit qanimut suleqatigalugit akuersissutinik utertitsisarneq malinnaaffigivaa, utertinneqartannginnerat taamatullu pisanik nalunaaruteqartannginneq piniartunut ataasiakkaanut akuersissutinik qinnuteqarsinnaanissamut ukiuni aggersuni kinguneqassaaq.

Erseqqissaatigineqarpoq qamuteralaat, ATV-t kiisalu qamutit motoorinik ingerlatillit allat tuttunik malersuinermi piniutigissallugilluunniit inerteqqutaammata.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl imaluunniit AC fuldmægtig Nuka Møller Lund, tlf. 345345, email: numl@nanoq.gl

Ilanngussaq 1: Nunap immikkoortuini piniarnissamut piffissat pisassiissutillu.

Ilanngussaq 2: Kalaallit Nunaata kitaani tuttunut Piniarfik 1-11.