Kalaallit Nunaanni suliffeqarfiit aamma oqartussaasut CVR-imi nalunaarsorneqassapput

Upernavik

Ulloq 1. januaari 2018 aallarnerfigalugu Inuussutissarsiutinik Ingerlataqartunik Nalunaarsuiffik (IIN) atorunnaassaaq. 2018-imi januaarip aallaqqaataanit atuutilersumik Danmarkimi det Centrale Virksomhedsregister (CVR) atorneqalissaaq. Allannguut Kalaallit Nunaanni suliffeqarfinnut aamma Kalaallit Nunaanni pisortatigut oqartussaasunut, taamatuttaaq nunani allamiut suliffeqarfiutaannut IIN-imi pilersinneqarsimasunut atuutissaaq, taamatullu suliffeqarfinnut il.il. 1. januaarip 2018-ip kingorna nalunaarsorneqartunut.

Kalaallit Nunaanni suliffeqarfiit aamma piginneqatigiiffiit Inuussutissarsiutinik Ingerlataqartunik Nalunaarsuiffimmi (IIN) nalunaarsorneqarsimasut CVR-imut namminneq (automatiskiusumik) nuunneqassapput. Tamatuma kingornatigut Kalaallit Nunaanni suliffeqarfiit aamma oqartussaasut ingerlataat CVR-imi takuneqarsinnaassapput CVR-imi normoqarlutik, suliaqarfik, nioqqutissiorfiit, suliffeqarfimmi peqataasut il.il danskit suliffeqarfiisut ittumik takuneqarsinnaallutik. Tamatumunnga ilutigitillugu suliffeqarfiit pillugit paasissutissat kalaallit oqaasii atorlugit takuneqarsinnaassapput, soorlu ullumikkut CVR tuluit oqaasii atorlugit takuneqarsinnaasoq.

Kalaallit suliffeqarfiutaasa namminneq paasissutissanik aaqqiisinnaaneq kalaallit oqaasii atorlugit Virk.dk-mi periarfissarilissavaat, tassani nalunaarutigineqarsinnaapput suliffeqarfiit inummit ataatsimik pigineqartut, interessentselskabit, kommanditselskabit, umiarsuaatileqatigiit, aningaasaateqarfiit aamma peqatigiiffiit. Aaqqiineq nutaaq tassaassaaq imminut kiffartuulluni suliaqarsinnaanermik aaqqiineq. Akileraartarnermut Aqutsisoqarfik 31. decembari 2020 tikillugu CVR-imi immersuisarnermut aamma allanngortitsisarnermut pisariaqartitsineq naapertorlugu ikiuuttarsinnaavoq.

Kalaallit Nunaanni aningaasaliilluni ingerlatsiviit (A/S aamma ApS il.il.) ullumikkut IIN-imi nalunaarsimanermik saniatigut aammattaaq CVR-imi nalunaarsorneqareerput, nalunaarsorsimanermut normumik taaneqartartumik. Ingerlatsiviit (selskabit) 1. januaari 2018 aallarnerfigalugu CVR-normoqalissapput, taanna CVR-imi Virk.dk-mi tamanit takuneqarsinnaalissaaq, tamatuma saniatigut Kalaallit Nunaanni aningaasaliilluni ingerlatsiviit pillugit nalunaarsuineq aamma tamanut saqqummiussineq allamik allannguuteqassanngilaq.

IIN-ip CVR-imut 1. januaari 2018-imi nuunneqarnissaa sioqqullugu maannakkut suliaqarfiit ilisarnaataat GB2000 danskit suliaqarfiisa ilisarnaataannut DB07-imut nuunneqassaaq. Nuussinermut ilisarnaat taanna Akileraartarnermut Aqutsisoqarfiup nittartagaani www.aka.gl-imi aamma www.ger.gl-imi takuneqarsinnaassaaq.

Tunngaviusoq

Nalunaarsuiffiit taakku marluk ataatsimoortilernerannut tunngaviusoq nalunaarusiami ”Kalaallit Nunaata Danmarkillu akornanni niuernermi inuussutissarsiutitigut suleqatigiinnerup siuarsarnera” 2015-imeersumi takuneqarsinnaavoq. Nalunaarusiap inassutigisaasa aqqaneq marluusut ilaat Danmarkip aamma Kalaallit Nunaata suliffeqarfiit nalunaarsorneqartarnerannut tunngatillugu suleqatigiinnerulernissaannut sammivoq, tassani siunertarineqarpoq kalaallit suliffeqarfiisa imminnut nalunaarutigisarnerisa aamma attaveqaqatigiittarnerisa digitaliusumik periarfissaqarnissaasa annertusarneqarnissaat.

Piviusut

  • Inatsisartunit akuersissutigineqarpoq Qitiusumik Suliffeqarfinnik Nalunaarsuiffimmi nalunaarsuisarneq pillugu Inatsisartut inatsisaat nr. 33, 28. november 2016-imeersoq.
  • Ulloq 1. januaari 2018 Inuussutissarsiutinik Ingerlataqartunik Nalunaarsuiffik (IIN) pigineqartoq matussaaq paasissutissallu CVR-imut nuunneqassapput.
  • Ullumikkut IIN-imi 6000 missaaniittut imikkoortut inatsisitigut pisinnaatitaasuusut pisussaatitaasuusullu ingerlasutut nalunaarsorsimapput, taakkua affaasa missaat suliffeqarfiupput inunnit ataasiakkaanit pigineqartut 1000-illu missaat tassaallutik aningaasaliinikkut piginneqatigiiffiit. Sinneri tassaapput suliffeqarfittut allatut nalunaarsorneqarsimasut soorlu imatut interessentskabit, kommanditselskabit aamma aningaasaateqarfiit oqartussaasut suliffeqarfii ilanngullugit. Immikkoortut INN-imi nalunaarsorsimapput GER normoqarlutik, tassalu tamakkuupput maannakkut CVR normumik tunineqartussat.
  • INN nuunneqarpat CVR-imut suliffeqarfiit, ingerlatsiviit (selskabit) aamma oqartussaasut ingerlatsivii nalunaarsorneqarsimasut maannakkut GER normortik pigiinnassavaat, taanna CVR normutut atulissaaq. Kalaallit suliffeqarfiutai pillugit nalunaarsukkat CVR-imi tamanut saqqummiunneqassapput Virk.dk-mi takuneqarsinnaallutik soorlu danskit suliffeqarfiutai taamaattut assigalugit.

 

Paasisaqarnerorusukkaanni attavigineqarsinnaavoq Akileraartarnermut Aqutsisoqarfimmi siunenrsorti Lars Bo Lauridssen oqarasuaat +299 34 65 82 imaluunniit e-mail labo@nanoq.gl.