Nunarput Ruslandimik 2018-imut aalisarnissamut isumaqatigiissuteqarpoq

Stemningsbillede

Nunarput Ruslandilu 2018-imi aalisarnissaq pillugu isumaqatigiissuteqarput, isumaqatigiissillu nunatta Ruslandip imartaani kiisalu russit nunatta imartaani ukiumi aggersumi aalisarsinnaanissaannut tunngaviussaaq.

Russit tunumi qaleralittassaat kiisalu suluppaagartassaat ikilineqarput, tassa qaleralittassat 200 tonsinik kiisalu suluppaagartassaat 50 tonsinik appartinneqarmata.

Russit kitaani avaannarpasissutsip 68o00-p kujataani qaleralittassaat aamma 100 tonsinik ikilineqarput, avaannarpasissutsillu 68o00-p avannaani qaleralittassaat allannguuteqaratik.

Nunatta 2018-imi Barentshavimi misaqqarnartassai 50 tonsinik ilaneqarput, saarullittassallu 600 tonsinik ikilisinneqarlutik biologit siunnersuinerata appariaateqarsimanerat pissutigalugu. Nunatta Barentshavimi raajartassat 500 tonsit suli pisassarissavai. Raajartassat taakku 2015-imi isumaqatigiissummut ilanngunneqarput taamanikkullu maannamut suli allannguuteqarsimanatik.

Inuussutissarsiortunit aallartitat Naalakkersuisoqarfimmeersullu naliliipput isumaqatigiissut nunatsinnut Ruslandimullu naleqaqisoq, ilaatigut illuatungeriit aalisariutinik ukioq naallugu aalisarnissamut periarfissiisarmat. Kalaallit Nunaata Ruslandimik aalisarnermut isumaqatigiissutaa marsip arfineq aappaanni 1992-mi isumaqatigiissut tunngavigineqarpoq.

Nunatta Ruslandimik 2018-imut aalisarneq pillugu isumaqatiginninniarnera, atorfilittanit København-imi decembarip sisamaanni tallimaannilu 2017-imi isumaqatiginninniutigineqarpoq.

Aalisarnermut Piniarnermullu Naalakkersuisoqarfik nunatta imartaani Ruslandillu imartaani 2018-imut aalisarnissamut decembarip tallimaanni 2017-imi isumaqatigiissuteqartuuvoq.

Ataani takuneqarsinnaapput 2018-imut isumaqatigiissummut nalunaarsuiffik, kiisalu ukiuni siusinnerusuni pisassiissutaasimasut:

 

Attavigineqarsinnaavoq Aalisarnermut Piniarnermullu Naalakkersuisoqarfimmi siunnersortit pisortaat, Emanuel Rosing. Mail: emro@nanoq.gl