Issittumi SNG-it pillugit ataatsimeersuamermi peqataasut soqutiginninninerat annertooq

Namminiilivinnermut, Nunanut allanut Nunalerinermullu Naalakkersuisoq Suka K. Frederiksen, ”SDG’s in the Arctic” pillugu ataatsimeersuarnermi decemberip aallaqqaataani Københavnimi qaaqqusisooqataavoq. Peqataasut 250-iupput ini ataatsimiiffiusoq ulikkaarluinnarlugu, ataatsimeersuarnermut peqataasuniit 60-it missaanniittut nunatsinniit peqataajartorput.

Nunat Ataatsimoortut Peqatigiit (FN)-ip nungusaataanngitsumik ineriartornermut anguniagaat SDG-tut taagorneqartut Københavnimi Eigtveds Pakhusimi ataatsimeersuarnermi sammineqarput. Namminiilivinnermut, Nunanut allanut Nunalerinermullu Naalakkersuisoqarfimmit, Nunanut allanut ministereqarfimmit taamatullu Savalimmiut Nunanut allanut Inuussutissarsiutinullu Naalakkersuisoqarfiannit aaqqissuunneqarpoq.

Ataqqinartorsuup Kunngissap Frederiup ataatsimeersuarneq aallarnerpaa Nunatsinnut atassuteqarnini misilittagaqarninilu tunngavigalugu oqalugiarluni.

Ataatsimeersuarnermi Namminiilivinnermut, Nunanut allanut Nunalerinerlullu Naalakkersuisoq Suka K. Frederiksen, taamatullu Aningaasaqarnermut Akilerartarnermullu Naalakkersuisoq Aqqaluaq B. Egede, Naalakkersuisut sinnerlugit oqaaseqarput. Suka K. Frederiksenip oqaaseqarnermini Kalaallit Nunaata ataavartumik anguniagakkat sumiiffimmi pisariaqartitanut naleqqunnissaat qanoq pingaaruteqartiginersoq oqariartuutigaa. Nunarsuarmioqatigiit Kalaallit Nunaanni ilisimatusarnerat qujanaqisoq sumiiffinni innuttaasunut annertunerusumik soqutiginarsarneqarnerunissaa tassani aamma erseqqissarneqarpoq:

”Assersuutigalugu nunatsinni uumasut piniagassat sumullu nikittarneri pillugit paasissutissat piniartunut iluaqutaalluarsinnaapput. Taamaattorli ilisimatusarnerit siunertaat oqariartuutaallu tamanit paasineqarsinnaaneq ajorput. Paasisallu inuiaqatigiinnut soqutiginarsarnissaat anguniassallugu akisussaaffigaarput.”

Kalaallit Nunaanni nungusaataanngitsumik ineriartortitsinermi aaqqissuussaanermut, ilinniartitaanermut, digitalimullu tunngasut unammillernartut siuariarnisaat siunertaasoq Aqqaluaq B. Egede-p oqariartuutigaa. Tamanna anguniarlugu 2016-imi Naalakkersuisut piusinnaanermut ineriartornermullu pilersaarut akueraat, tassani nunarsuarmioqatigiit inuiaqatigiinni nungusaataanngitsumik ineriartortitsinermi anguniagaat aallaavigalugu suliaalluni.

Ilaatigut FN's Global Compact organisationimi pisortaq, Lise Kingo, ataatsimeersuarnermi peqataavoq. Taamatuttaaq nungusaataanngitsumik aningaasaqarnikkut ineriartorneq pillugu ingerlaavartitsisut SDG-it pillugit issiaqatigiillutik oqallinnerit marluusut ingerlanneqarput. Tassani Kalaallit Nunaat sinnerlugu Lotte Frank Kirkegaard CSR Kalaallit Nunaannit aammalu Kristian Reinert TelePostimit peqataapput.

Annertunerusumik paasisaqarusukkussi immikkut siunnersorti Mira Kleist +45 26434945 imaluunnit Naalakkersuisoqarfimmi pisortaagallartoq Jacob Isbosethsen +45 40402623 allavigineqarsinnaapput.