QR-Kode pillugu Bruxellesimi isumasioqatigiissitsineq puisinniartarnerup inerteqqutaannginneranik ilisimasaqarnerulersitsissaaq

Naalakkersuisoq Karl-Kristian Kruse, Great Greenland aamma KNAPK EU-mi tunisassianut puisineersunut QR Kode-mik nutaamik allagartaqartitsisalernissaq pillugu suliniummik ilisarititsipput. QR Kode-mik allagartaqartitsineq kalaallit piniartuinut iluaqutaasussamik puisip amiinik tuniniaanerulernissamut iluaqutaasinnaalluarpoq

Karl-Kristian Kruse ullumikkut Bruxellesimi Danmarkip aalajangersimasumik Sinniisoqarfiani puisit pillugit isumasioqatigiinnermut peqataavoq. EU-mi tunisassianut puisineersunut meqqilersuisarnermut suliniummi nutaamik QR Kode-mik atuilernissamut tunngatillugu EU-mi aalajangiisartut suleqatigisallu attuumassutillit ilisimatinneqarnissaat paasissutissiiffigineqarnissaallu isumasioqatigiinnermi siunertarineqarpoq.

Isumasioqatigiinneq Bruxellesimi Kalaallit Nunaata Sinniisoqarfianit aaqqissugaavoq, tassanilu Karl-Kristian Kruse pingaarnertut oqalugiartussaavoq kiisalu EU-mi Danmarkip ambassadøria Kim Jørgensen aamma Hovak Johnston Canadami Northwest Territories-imeersoq oqaaseqartussaallutik. Great Greenland suliniummik ilisarititsivoq, kingornagullu KNAPK-meersut, Pinngortitaleriffimmeersut, NAMMCO-meersut, FurEurope-imeersut aamma WWF-imeersut oqalugiartinneqarput, taakkulu Inuit puisinniartarnerisa inerteqqutaannginneranik isumannaatsumillu ingerlanneqartarneranik erseqqissaateqarput.

QR-Kode-mik meqqilersuisalernissamut suliniummut aamma Canada, Nunavut aammalu Northwest Territories tapersersuipput, tamannalu pissutigalugu isumasioqatigiinnermut aallartitaqarlutik peqataallutik.

Naalakkersuisut QR-imik meqqilersuisarneq tapersersormassuk Karl-Kristian Krusemit erseqqissarneqarpoq. QR Kode-mik meqqilersuisarnermut suliniut puisinit tunisassianik Inuit puisinniarnerannit pisunik EU-mi pisisarnerup tuniniaasarnerullu inerteqqutaannginnera pillugu annerusumik paasissutissiisarnissaq pingaaruteqartorujussuanngorsinnaavoq. Ilisimaatsuuneq EU-mut nioqquteqarnermut aamma EU-mut tuniniaasarnermut akuttunngitsumik akornutinngortarsimavoq. QR Kode-mik meqqilersuisarnermut suliniut aqqutigalugu ilisimasaqannginneq tunngavigalugu akornutinngortartut ajunnginnerusumik peerneqarsinnaalissapput. Tamanna EU-p iluani puisit amiinik tuniniaasarnerup aallartilluarnissaanut pingaaruteqarluinnalersinnaavoq, neriuutaavorlu Kalaallit Nunaanni piniartut tuniniaanerulernermikkut aningaasaqarnermikkut inissisimalluarnerulissasut.

Isumasioqatigiinneq EU-mi aalajangiisartunit, nunanit ilaasortaasunit suleqatigiiffinniillu ornigarluarneqarpoq, ilaatigullu puisinit tunisassiat Great Greenlandimeersut, takutitassiat Kalaallit Nunaat puisillu pillugit paasissutissartallit aamma saqqummersinneqarlutik.

Karl-Kristian Kruse isumasioqatigiinnermut tunngatillugu imatut oqaaseqarpoq:

”Isumasioqatigiinneq ornigarluarneqarpoq, oqalugiartorpassuillu isumannaatsumik puisinniartarnermut tunngatillugu sorpassuartigut paasissutissiipput, tamannalumi EU-mi tusagassiortunit soqutigineqarluarpoq. QR Kode-mik meqqilersuisarneq immini tuniniaanerulernermik kinguneqartussaanngilaq, tamatumunngali tunngavissiisinnaavoq, taamatullu pitsanngoriaateqarneq Naalakkersuisunit tamakkiisumik tapersersorparput. Oqariartuup-put Bruxellesimi ulluni pingasuni kingullerni ataatsimiittarnerni paasineqarluarpoq.”

Assit takukkit

 

Attavigisassaq: Amalie Jessen (AMALIE@nanoq.gl)