Karl-Kristian Kruse EU-meersunik ataatsimeeqateqarpoq

Aalisarnermut Piniarnermullu Naalakkersuisoq Karl-Kristian Kruse puisinit tunisassiat pillugit QR-inik kodelinnik meqqilersuinerup nutaap Europa-Parlament-imi saqqummiunneqarnerani peqataavoq, meqqilersuinissarlu EU-mi aalajangiisartunit tapersersorneqarpoq

Aalisarnermut Piniarnermullu Naalakkersuisoq Karl-Kristian Kruse Bruxelles-imiippoq Great Greenlandip puisinik tunisassianik QR-inik kodelinnik meqqilersuiniarluni suliniutaanik tapersersuiartorluni tamannalu sapaatip akunnerani matumani EU-mut attuumassuteqartunullu saqqummiunneqassaaq.

Karl-Kristian Krusep ippassaq marlunngormat naapippai Europa-Kommissærinut Margrethe Vestager-imut aamma Karmenu Vella-mut siunnersortaanerit aamma Europa-Parlamentimi ilaasortaq Jørn Dorhmann. Ataatsimiinnerit siunertarisimavaat QR-kodelinnik meqqilersuiniarnermi suliniutit inerisarnissaanut tunngasumik suleqatigiinnerup ingerlanneqaannarnissaata qulakkeernissaa, taamaalilluni ilaatigut EU-mi akitsuuserisunut, niuertarfinnut, pisisartunut il.il. Inuit puisittaannit nioqqutissiornerup EU-mi inerteqqutaannginneranik paasisitsiniaanerup patajaallisarneqassalluni. 

QR-kodelersuinissamik suliniut Europa-Parlamentimut ullumi pingasunngornermi isumasioqatigiinnermi saqqummiunneqarpoq, tassani Jørn Dohrmann qaaqqusisuulluni Karl-Kristian Kruselu pingaarnertut oqalugiarluni.  Great Greenlandip suliniut pisortatigoortumik saqqummiuppaa taassumalu kingorna ilaatigut Aaju Peter Nunavumeersoq, KNAPK, NAMMCO aamma WWF-imeersut oqalugiarput Inuit puisinniartarnerat inatsisinik unioqqutitsinerunnginnera aamma nungusaataannginnginnera pillugu sammineqarluni. 

Canada, Nunavut aamma Northwest Territories QR-kodelersuiniarneq pillugu suliniut tapersersorpaat taamaammallu ataatsimiinnerni taaneqartuni Europa-Parlamentimilu isumasioqatigiinnermi aallartitaqarlutik.

Ulloq naggaserneqarpoq Danmarkip EU-mi ambassadøriinik Vibeke Pasternak Jørgensen aamma Kim Jørgensen-imik ataatsimeeqateqarnernik, tassani Danmarkip EU-mut ilaasortaaneranut atatillugu EU-p ataani Kalaallit Nu­naa­ta soqutigisaanik puisinniarnermut puisinillu tunisassianik niuernermut tunngasunik aamma isumaginnittuusut.

Attavissaq: Amalie Jessen (AMALIE@nanoq.gl)