Pinngortitaleriffimmi illorsuaq atoqqaartinneqartoq

Naalakkersuisut Siulittaasuannut tullersorti siulleq, Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq Sara Olsvig, Pinngortitaleriffimmi Pinngortitalerinermik Ilisimatusarfiup aamma Kalaallit Nunaanni Peqqissusermik Ilisimatusarfiup illutassaata nutaap pisortatigoortumik atoqqaartippaa pingasunngornermi 29. novembari 2017.

Naalakkersuisoq Sara Olsvig atoqqaarfissiornermi oqalugiarami ilaatigut ima oqarpoq:

“Pinngortitami pisuussutit qanoq pitsaanerpaamik atussanerivut pillugu ilisimasavut ineriartortittuartussavagut, taamatullu mingutsitsinerit pinngortitamut peqqissutsitsinnullu sunniutai pillugit ilisimasavut annertusassavagut. Ilisimatusarnermut pinngortitami isumalluutinik atuinitta piujuaannartitsineq ilisimasallu tunngavigalugit ingerlanissaannut aaqqissuussinissarput pingaaruteqartorujussuuvoq.”

 

Aage V. Jensens Fondip Maersk Oil Kalaallit Nunaatalu aningaasaliinerisigut Nuup Kangerluanut isikkivilimmik illorsualiornissaq piviusunngortinneqarsinnaasimavoq.

”Neriuutigaara pingaarutilinnik maani sulianik ingerlataqartussaasusi atuisut ilisimasaannik najukkanilu ilisimasanik pinngortitalerinermut atassuteqartitsilluarneq pingaaruteqaqisoq nangikkumaarissi. Pinngortitaleriffiup aqutsisui aammalu ilisimatuut namminneerlutik maanna sinaakkutissat nutaat ilisimatusarnermik, ilinniartitaanermik sulianillu immersortussanngorpaat,” Sara Olsvig oqalugiarami aamma oqarpoq.

Oqalugiaat tamakkerlugu uani atuaruk.

Paasisaqarnerorusukkaanni saaffigineqarsinnaavoq Naalakkersuisumut allatsi Nina Jul Larsen oqarasuaat +299 53 93 71 imaluunniit e-mail nina@nanoq.gl.