Qimussertitsilluni takornariartitsinerup ineriartortinnissaa isumasioqatigiissutigineqarpoq

Qimussertitsilluni takornariartitsinerup ineriartortinnera sammisaralugu Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik Visit Greenland suleqatigalugu Kangerlussuarmi ulluni makkunani isumasioqatigiisitsivoq. Nunamit tamarmi qimussertitsisartut qaqquneqarput, ineriartortitsinissamut isumassarsianut nutaanut isumassarsitinniarlugit, aammalu misilittakkanik paarlaasseqatigiissinniarlugit.

Inuussutissarsiutit allat assigalugit piniartuuneq sukkasoorujussuarmik aamma allanngoriartorpoq. Pissusissamisoorpoq – avaqqunneqarsinnaananilu. Taamaattumik periarfissat nutaat takkuttut tamatigut iluaqutiginiarneqartarnissaat pingaartorujussuuvoq.

Takornariartitsinerpiarmilu ipput qimussit atornissaannut ineriartortitsinissamut periarfissarpassuit.

Takornarianut qimussertitsisarneq sumiiffippassuarniannertoorujussuarmik aningaasarsiutigineqarpoq. Norgep avannaani Svalbardimi suliffeqarferujussuit qimussertitsisartut, takornarianik angallassinerinnarmik inuussuteqartut arlaliulersimapput. Nalunaaqqutap akunnialunnguinit ullut arlerlugit qimussertitsisarnerit neqeroorutaasarput – taamaalillunilu angalaarnernit sivikitsunit ilisimasassarsiornerpalaarnerusunullu kikkunnut tamanut neqerooruteqarluni. Aamma Islandimi, Canadami, Sverigemi Finlandimilu qimussertitsilluni misigisassanut neqerooruteqartorpassuarnik takusassaqarpoq. Tassaapput misigisassanut tunisassiat annertuumik nuannarineqartut – tamakkulu annertuumik piumaneqarpasipput.

“Tunisassiamik assissaqanngilluinnartumik pilerisaarinissamut isumaga malillugu nunatsinni qimussertartut assissaqanngitsumik periarfissaqarput -–qimussertarnermimmi ileqqoq suli uumassuseqartuuvoq”. Naalakkersuisoq Hans Enoksen oqarpoq, nangillunilu: “Taamaattumik sumiiffippassuarni allani takuneqarsinnaanngitsumik Nunatsinni qimusserluni angalaneq asseqanngilluinnartuussaaq.”

Qimussernermik ileqquusup kulturikkut annertuumik tunngaveqarnera niuernermi tunisassianut pissanganartunut aallaavittut atorneqarsinnaavoq, tamatumalu piffissap ingerlanerani qimussertitsisarneq inuussutissarsiutivinngortissinnaavaa. Inuussutissarsiornermut ineriartortitat – minnerunngitsumillu takornariartitsinermi – Naalakkersuisut assut sammisaraat. Taamaalilluni tunisassianik aamma takornariartitsinermik ineriartortitsinernut Aningaasanut Inatsimmi aningaasanik immikkoortitsisoqarpoq – inuussutissarsiornermut siuarsaanissamut aningaasat taakku Greenland Businessimit, siunnersuinermik ikiorsiisinnaasumit aqunneqarput. Taakku saniatigut aallarnisaasartunut aaqqiissummik Naalakkersuisut pilersitsisimapput – taassuma siunertaa tassaalluni ineriartortitsineq aamma siuarsaaneq pillugit suliffeqarfinnut kissaateqartunut anguniagalikkatut siunnersuisarnissaq. Siunnersuisarnermut tapiissuteqartarnermullu periarfissat taakku aamma isumasioqatigiinnermi peqataasunut saqqummiunneqarput.

Annerusumik paasissutissinneqarniaraanni attavigineqassaaq Naalakkersuisoqarfimmi pisortaaneq Jørn Skov Nielsen, mobil 556188 amma Mads Skifte, Visit Greenland 55 82 78.