Ujaqqat unioqqutitsilluni katersat arsaarinnissutigineqarput

Ujaqqat nunatsinneersut 500 kiilunit oqimaannerusut innuttaasup inatsisinik unioqqutitsilluni nunatsinnit avammut nassiunniagai, Aatsitassanut Ikummatissanullu Naalakkersuisoqarfimmit arsaarinnissutigineqarput. Ujaqqanit arsaarinnissuigineqartunit annertunerpaat nunatsinni inatsisinik unioqqutitsilluni katersorneqarsimapput. Taamattaaq ujaqqat nunatsinnit Danmarkimut nassiunneqarnissaminnut piareeqqasut avammut nassiussinissamut inatsit malillugu piumasaqaataasumik akuersissummik tunniussisoqarsimanani. Ujaqqat millionip koruunit angungajallugu minnerpaamik naleqarput.

Nakkutilliineq arsaarinninnerlu
2017-imi oktobarip qaammataani Aatsitassanut Ikummatissanullu Aqutsisoqarfik inatsisinik unioqqutitsilluni ujaqqanik katersisoqarneranik innuttaasunit ilanngaaserisunillu kalerrinneqarpoq. Ujaqqat katillugit 569 kiilut kryolitinik, sodalitinik,tugtupitinik ussingitinik ujaqqanillu katersorneqartartunik assigiinngitsunik annikitsunik ilaqartut nassiunnissaat unitsikkallarneqarpoq. Ilanngaaserisut nassiussassat avammut anninneqarnissaannik akuersissummik amigaateqarnerat unitsitsinerminni aamma paasivaat.

Aatsitassanut Ikummatissanullu Naalakkersuisoqarfiup ujaqqat Ilanngaaserisuniitinneqarallartut misissorpaat taamattaarlu innuttaasumut pineqartumut kalerreeqqaarnatik nakkutilliiartorput. Tamanna tunuliaqutaralugu ujaqqat amerlanersaat piffinni kisermaassilluni misissuiffimmiittuni, ujarlernissamut ujaqqanillu katersinissamut kisermaassiviusussatut akuerineqartuni katersorneqarsimanerat naalakkersuisoqarfiup inerniliuppaa. Kikkulluunniit piffinni kisermaassiviusuni kisermaassinissamut akuersissutaatilimmit allakkatigut akuerineqarsimanani katersisinnaatitaanngillat. Ujaqqat pineqartut pillugit kisermaassisussaatitaasunit allakkatigut akuersissummik peqartoqanngilaq.

Taamattaaq ujaqqat nassiussassat 569 kiiluusut, Danmarkimi tigusisussamut tuniniariaraluarneqarlutillu nassiunneqariaraluartut avammut nassiussinissamut akuersissummik qinnuteqaataasimanatillu akuersissummik pigisaqartoqannginnera Naalakkersuisoqarfiup paasivaa. Tamannalu tunuliaqutaralugu Aatsitassanut Ikummatissanullu Naalakkersuisoqarfiup ulloq 9. november ujaqqat arsaarinnissutigineqarnissaat aalajangerpaa. Kingorna ujaqqat tuniniarneqassapput iluanaarutillu nunatta karsianut nakkartinneqassapput. Ujaqqat minnerpaamik katillugit 155.000 USD-nik (980.000 kr-inik) naleqartut Aatsitassanut Ikummatissanullu Naalakkersuisoqarfiup nalilerpaa.

Aatsitassanut Ikummatissanullu Naalakkersuisoq Múte B. Egede ujaqqanik unioqqutitsisumik katersanik anniseriarneqartunillu Aatsitassanut Ikummatissanullu Naalakkersuisoqarfiup iliuuseqarnera iluarisimaarpaa, imalu oqaaseqarluni: ”Aatsitassanik nunatsinneersunit iluaquteqarnerup, tunisinerup avammullu nioqquteqarnerup inatsisit naapertorlugit pinissaa pingaaruteqarpoq. Tamanna nunatsinni aatsitassarsiornermik ineriartortitsiuarnissatta qiteraa. Ujaqqanik nunatsinneersunik inatsisit unioqqutillugit avammut annissinermik ilisimasaqaraanni pasitsaassaqaraanniluunniit aatsitassanut oqartussaasunut attaveqartoqartarnissaa kaammattuutigaara.”

Paasissutissat: Avammut niuerneq, ujaqqat akiinik naliliineq aatsitassarsiornermillu ingerlatanik nakkutilliineq
Nunaqavissut ujaqqanik katillugit 25.000 kr-inik nalitunerusunik annissinissamik (avammut nioqquteqarnissamik) kissaateqartillugit, taamatullu avammut annissineq niuernermut atatillugu pippat, avammut nassiussisinnaanermut akuersissummik peqarnissaq piumasaqaataavoq.

Aatsitassanut Ikummatissanullu Naalakkersuisoqarfiup ujaqqanik nalilersuisarnera periutsit nunarsuarmi akuerisaasut taamatullu ujaqqat pitsaassusaannik ujarassiuut naliliinerat naapertorlugit pisarpoq.

Aatsitassanut Ikummatissanullu Naalakkersuisoqarfik Naalakkersuisut sinnerlugit sulianik aatsitassanut ikummatissanullu inatsimmut attuumassuteqartunik nakkutilliinermik ingerlatsisarpoq. Aatsitassanut Ikummatissanullu Naalakkersuisoqarfik pisariaqartitsineq naapertorlugu nakkutilliinerminut atatillugu eqqartuussivinnik akuersisitseqqaarnani aatsitassanut ikummatissanullu inatsimmut atatillugu suliffeqarfinnik sulianillu misissuisinnaatitaavoq. Aatsitassanut Ikummatissanullu Naalakkersuisoqarfittaaq peqqusisinnaavoq ujaqqat katersat aatsitassanut ikummatissanullu inatsit naapertornagu katersorneqarsimatillugit, piiarneqarsimatillugit iluaqutigineqarsimatillugilluunniit aammalu arsaarinnissinnaatitaalluni. Aatsitassanut Ikummatissanullu Naalakkersuisoqarfik nunatsinni aatsitassarsiornernik ingerlatanik suugaluarnersunik tamanik ataavartumik nakkutilliinermik ingerlataqarpoq taamatullu Ilanngaasersisunik kiisalu nunatsinni oqartussanik allanik nakkutilliinermini suleqateqarluni.

Ukununnga saaffiginnilluni paasissutissat annertunerusut pissarsiarineqarsinnaapput:Jørgen T. Hammeken-Holm,Naalakkersuisoqarfiup pisortaa - Aatsitassanut Ikummatissanullu Naalakkersuisoqarfik, tlf: 346846, e-mail: joeh@nanoq.gl

Jane Petersen Lantz, Naalakkersuisup allattaa – Aatsitassanut Ikummatissanullu Naalakkersuisoqarfik, tlf: 346839/597909, e-mail: japl@nanoq.gl