Agathe aamma Doris Islandimi paasisassarsiorlutik angalapput

Islandimi inuusuttut imigassamik aalakoornartortalimmik atuinerata ukiut 20-t ingerlaneranni annertuumik appartillugu Islandimiut periusiat paasisaqarfiginerujumallugu Peqqissutsimut Nunallu Avannarliit Suleqatigiinnerannut Naalakkersuisoq Agathe Fontain aammalu Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris J. Jensen Islandimut angalaqatigiipput.

-”Islandimi pitsaaliuinermik sulianut atatillugu tamanut sammisumik suliniuteqarneq iluatsitsiffiulluarpoq. Isumaqarpunga nunatsinni peqqissutsimik siuarsaaniarnermik pitsaaliuinermillu suliat nukittorsarniarnerini Island isumassarsiorfigissagipput. Islandimi maligassiuisut malissagutsigit peqqissutsimut ilinniartitaanermullu tunngasutigut qanimut suleqatigiinnissaq pisariaqarmat Dorisilu angalaqatigiinnerput manna assut nuannaarutigaara,” taama oqarpoq Peqqissutsimut Naalakkersuisoq, Agathe Fontain.

-”Islandimi atuarfeqarnermut timersornermullu tunngasutigut misilittakkat, pingaartumik atuarfimmi peqqissutsimik siuarsaaneq aammalu atuarfiup angajoqqaallu akornanni suleqatigiinneq nukittorsarniarlugu suliniuteqarneq tusarfigissallugit, qilanaaraakka. Taakku suliassaqarfiupput Islandimi misilittakkanit isumassarsiorfigilluarsinnaasavut,” taama oqarpoq Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq, Doris J. Jensen.

Islandimi periuseq Islandimi ukiut kingulliit 20-t ingerlaneranni pitsaaliuinermut peqqissutsimillu siuarsaanermut suliniutinut ataatsimut taaguutaavoq. Islandimi imigassamut aalakoornartortalimmut inatsit qinikkanit sukateriffigineqarpoq aammalu meeqqat inuusuttuaqqallu unnukkut qaqugukkut angerlartarnissaat pillugu maleruaqqusanik imaqarluni. Tamatuma peqatigisaanik atuarfimmut tunngasut angajoqqaanillu suleqateqarneq annertuumik aallunneqarput. Kiisalu meeqqat inuusuttuaqqallu sunngiffimmi sammisassaqartinneqarnissaat pitsanngorsarniarlugu Islandimi annertuumik suliniuteqartoqarpoq.

Islandimi pitsaaliuinermi suliniuteqarnermi pingaaruteqartut ilaat tassaavoq atuarfinni ataasiakkaani meeqqat atugarissaarnerannik ingerlaavartumik misissuisarneq, tamanna malillugu najukkani atuarfinni ataasiakkaani atuartut atugarissaarnissaat siuarsarniarlugu siunnerfeqartumik suliniuteqartoqarsinnaalluni.

Inuusuttut akornanni imigassamik aalakoornartortalimmik atuineq annikillisinniarlugu Islandimi suliniutit kinguneqarluartunik angusaqarfiupput. 1998-imi Islandimi inuusuttut imigassanik aalakoornartortalinnik atuinerat Europami qaffasinnerpaat ilagaat. 2015-imi atuineq appariaateqarpoq, taamaalillunilu Islandimi inuusuttut imigassamik aalakoornartortalimmik atuinerat Europami ullumikkut appasinnerpaat ilagalugu.

Naalakkersuisunut ilaasortat marluk 27.-30. novembarimi Islandimiissapput. Tikeraarnerup nalaani Islandimi periuseq paasisaqarfigiumallugu ataatsimiinnerit arlallit ingerlanneqarnissaat pilersaarutaavoq.

Professori Inga Dóra Sigfúsdottir aamma Reykjavikimi Universitetimi pisortaq Jón Sigfússon Islandimi periuseq pillugu saqqummiussissapput. Taakku tamarmik Planet Youthimi suliniuteqartuupput, tassaasoq Islandimi pitsaaliuinermut periutsip nunarsuup sinneranut oqariartuutigineqarnissaanik suliaqartut.

Naalakkersuisunut ilaasortat marluk taakku aamma Islandimi timersoqatigiinnermut kattuffik naapissavaat, tassani timersorneq aqqutigalugu pitsaaliuineq aammalu peqatigiiffiup skolehjeminut atatillugu suliniutai tusagaqarfigissallugit. Aamma najugaqarfinni mikinerni ikorfartoqatigiit pillugit saqqummiisoqassaaq. Kiisalu Islandimi periutsip ingerlanneqarnera pillugu Seltjarnanes kommunip suliniutai saqqummiunneqassapput.


Annertunerusumik paasisaqarusukkaanni saaffissat:

Peqqissutsimut Nunallu Avannarliit Suleqatigiinnerannut Naalakkersuisumut Agathe Fontainimut allatsi Nauja Møller, mobil: +299 58 26 54 imaluunniit e-mail: nmoe@nanoq.gl

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisumut Doris J. Jensenimut allatsi: Rosa Thorsen,mobil +299 55 33 03 imaluunniit e-mail: rosat@nanoq.gl