Siusinaartumik pensionisiallit atugarliornerpaat atugaat pitsanngoriangaatsiassapput

Tunngaviusumik pensionisiat atulersinneqarnerat.
Siusinaartumik pensionisialinnut sulisinnaanngivissortunut taamaammallu sulinikkut isertitaqarsinnaanngitsunut 2018-imi januaarip aallaqqaataanit atugassarititaasut pitsaanerulersinneqassapput. Tunngaviusumik pensionisiat atulersinneqarnerisigut tamanna pissaaq, taannalu aapparisap isertitaanut attuumassuteqanngilaq.

”Siusinaartumik pensionisialinnut sulisinnaanngivissortunut taamaammallu sulinikkut isertitaqarsinnaanngitsunut tunngaviusumik pensionisiat atuutilersinneqarneratigut, utoqqalinersiallit assigalugit, siusinaartumik pensionisiallit aapparisamik isertitaat kisiisa naatsorsuutigiunnaassavaat. Matumuuna siusinaartumik pensionisiallit, utoqqalinersiallit assigalugit, aapparisap isertitai apeqqutaatikkunnaarlugit tunngaviusumik pensionisiaqalissapput," Isumaginninnermut Naalakkersuissoq Sara Olsvig oqarpoq.

Allannguut nutaaq siusinaartumik pensionisiaqarnermut annertunerusumik aaqqissuusseqqinnermut juulip aallaqqaataani 2016 atuutilersumut malitsigitillugu suliarineqarpoq. Aaqqissuusseqqinnerup ilaatigut siunertaraa siusinaartumik pensionisiallit amerlanerusut namminneq sulisinnaanermikkut periarfissaminnik iluaquteqarsinnaalernissaat.

Siusinaartumik pensionisiallit sulisinnaasut ilaasa nalinginnaasumik pensionisiaqarnerup saniatigut namminneq isertitaqarsinnaanerat Naalakkersuisut nuannaarutigaat. Siusinaartumik pensionisiallit allat killilimmik sulisinnaassusillit nalinginnaasumilli suliffeqarfeqarfimmi suliffissarsisinnaasimanngitsut suliffissanik naleqquttunik neqeroorfigineqartussaassapput. Taamaaliornikkut nalinginnaasumik suliffeqarnikkut inuuneqalersinnaanerup qanillinissaanut periarfissinneqassapput, tamannalu ilutigalugu nammineq sulinermikkut pensionisiamik saniatigut namminneq isertitaqarsinnaalerlutik.

”Siusinaartumik pensionisiaqarneq pillugu aaqqissuusseqqinnerup akuerineqarneranut peqatigitillugu aaqqissuusseqqinnerup siunertaa piviusunngornersoq paasiniarlugu allannguutit annertuut malinnaavigineqaqqissaarnissaat aalajangiunneqarpoq. Taamaammat aaqqissuusseqqinnerup malinnaavigineqarnissaata saniatigut aaqqissuusseqqinnerup nalilersorneqarnissaa aallartissavara. Aaqqissuusseqqinnermi anguniakkat anguneqarsimanersut paasisariaqarparput. Siusinaartumik pensionisiallit pisinnaatitaaffimmisut eqaannerusumik suliffissaqartinneqarnersut immikkut isiginiassavarput," Isumaginninnermut Naalakkersuissoq Sara Olsvig oqarpoq.

Maleruagassat nutaat januaarip aallaqqaataani 2018-imi atuutilissapput.

Annertunerusumik paasisaqarusuttut Naalakkersuisup allattaa Nina Jul Larsen tlf. 539371 aqqutigalugu attavigisinnaavaat.