Suka K. Frederiksen napparsimanerminut atatillugu sulinngiffeqareerluni sulileqqippoq

Matumuuna nalunaarutigineqassaaq Namminiilivinnermut, Nunanut Allanut, Nunalerinermullu Naalakkersuisoq Suka K. Frederiksen napparsimanerminut atatillugu sulinngiffeqareerluni ataasinngorneq novemberip ulluisa 27-anni 2017 sulileqqimmat.

Naalakkersuisoq uani sapaatip akunnerani Københavniliarluni aallariissaaq, tassani nunarsuarmioqatigiinni  ataatsimeersuartitsinissami decemberip aallaqqaataani pisussami qaaqqusisooqataassalluni, tassanilu ilaatigut FN-ip nunarsuarmi Issittumi Kalaallit Nunaannilu nunap iluani ataatsimoorussamik  ataavartumik anguniagaasa 17-iusut piviusunngortinniarneri pillugit oqaaseqassalluni.

Danskit Nunanut allanut ministeriat Anders Samuelsen taamatullu Savalimmiormiut Nunanut allanut Niuernermullu Naalakkersuisuat Poul Michelsen peqatigalugit FN-ip ataavartumik ineriartortitsineq taakkulu nunarsuarmi anguniagassanut suleqatigiinnerat pillugit ukkatarinniffiusumik ataatsimeersuartitsissapput. Ataqqinartup Kunngissap Frederiup ataatsimeersuarnissaq ammassavaa  Aningaasaqarnermut  Akileraartarnermullu Naalakkersuisoq Aqqaluaq B. Egede aamma oqaaseqassalluni.

Pilersaarut uani takuuk.

Suka K. Frederiksen piffissami sivisunerusumi napparsimanini pillugu sulinngiffeqarallarnikuuvoq, tassanilu piffissami  Naalakkersuisoq Karl-Kristian Kruse akisussaaffigisaanik paarlattaanikuulluni.

Suka K. Frederiksen ima oqaaseqarpoq: ”Suliffinnut uteqqinnissannut qilanaarnikooqaanga. Piffissap ingerlasimanera nalorninarlunilu sakkortusimavoq, taamaattorli katsorsarneqarlungalu ikiorluarneqarnera qujamasuutigeqaara. Namminiilivinnermut, Nunanut Allanut Nunalerinermullu Naalakkersuisoqarfimmi akisussaaffimma suliffigeqqilernissaanut qilanaarlunga sulinissara nangeqqissavara”.

Annertunerusunik paasisaqarusukkussi Nalakkersuisoqarfimmi Pisortaagallartumut Jacob Isboseth saaffiginnissinnaavusi oqarasuaat +299345152