Piniarneq pillugu Siunnersuisoqatigiit avammut oqaaseqaataat

Piniarneq pillugu Siunnersuisoqatigiit novembarip 21-ani ataatsimiinnerminni aalajangersimapput avammut imatut oqaaseqaateqarniarlutik:

 

Piniarneq pillugu Siunnersuisoqatigiit Naalakkersuisut kajumissarusuppaat Kalaallit Nunaata kujataata kitaani appanniarsinnaaneq 31. december ilanngullugu sivitsorneqassasoq isumaliuutgiissagaat. Piniarneq pillugu Siunnersuisoqatigiinni ilaasortaniit taaneqarpoq inuussutissarsiutigalugu piniartut ukiuunerani isertitassaqarnissamut periarfissaqarnerulernissaat tunngaviutinneqartoq.

Piniarneq pillugu Siunnersuisoqatigiit aamma Naalakkersuisut kajumissarusuppaat kalaalimineerniarfinni panertut, tarajortikkat qerisullu tuniniarneqaqqusaannginnerat malunnaatilimmik iliuuseqarfigeqqullugu. Piniarneq pillugu Siunnersuisoqatigiit paasivaat kalaalimerngit suliarineqarnikunik tuniniaasinnaanissamut immikkut akuersineq januaarip aallaqqaataani 2015-imili atuukkunnaarsimasoq. Taamaammat Piniarneq pillugu Siunnersuisoqatigiit Naalakkersuisut immikkut akuersissummik tunniussissasut kajumissarusuppaat, aammalu nalunaarut pineqartoq nutarterneqassasoq, tamakkuninnga nioqqutissanik tunisisinnaanissaq tulluartumik periarfissaqaleqqullugu.

Piniarneq pillugu Siunnersuisoqatigiit kissaatigisaminnut peqqutigaat kalaalimernginik nerineq kalaallit kulturiannut kinaassusaannut neqinillu nammineq pilersornermut pingaaruteqarmata. Aammattaaq Piniarneq pillugu Siunnersuisoqatigiit eqqasuutigaat ukiuni kingullerni akuerisaasimanngittuni aammalu Facebook-ikkut kalaalimernginik tuniniaaneq annertusigaluttuinnarnera. Piniarneq pillugu Siunnersuisoqatigiit Namminersorlutik Oqartussani kommuuninilu oqartussaasut kajumissaarusuppaat nakkutilliineq pissusissaatut ingerlanneqassasoq.

Naggasiullugu Piniarneq pillugu Siunnersuisoqatigiit Naalakkersuisut kajumissarusuppaat aavernik illersuineq piniarnerlu pillugu nalunaarut nutarterneqarnerani piffissaq piniarfiusoq martsip aallaqqaataaniit januaarip aallaqqaataani aallartittassasoq.

Piniarneq pillugu Siunnersuisoqatigiinni ilaasortat piniartut aavernik ukioq kaajallallugu nuliusartut takuneqartarsimanerat peqqutigaat, taamaammallu ukiumi piffissami aalajangersimasumi kisimi nuliuneq pisarani.

Piniarneq pillugu Siunnersuisoqatigiit ataatsimiinnerminni KNAPK sinnerlugu ilaasortaq Qaanaameersoq Jens Danielsen siulittaasutut qinersimavaat. Ilaasortat allat tassaapput KANUKOKA aamma TPAK.

Piniarneq pillugu Siunnersuisoqatigiit sinnerlugit

Jens Danielsen, Piniarneq pillugu Siunnersuisoqatigiinni siulittaasoq

Saaffigineqarsinnaavoq una aqqutigalugu jeda2@outlook.dk - tlf. 594677