Qaqortumi mittarfissaq pillugu akissuteqaat

Asasakka Kiista, Stine aamma Bentiaraq

Allakkassinnut ammasumut, 22. november 2017-imeersumut, Qaqortumi mittarfissamut tunngasumut qujanaq.

Siullermik ilisimatitsissutigissavara paasisinnaalluarakku qisuariaatersi. Tassami ukiorpassuarni kujataamiut utaqqisimasarsi kingumut kinguartinneqalaarneranut qisuariaatersi inissaminiimmat. Isumaqarpungali pingaaruteqartoq paasineqassasoq sooq kinguartinneqalaarnersoq. Tassami peqquteqavittumik tamanna aallaaveqarmat

Kalaallit Airports A/S-ip Qaqortumi mittarfimmik inissiiffissatut toqqarneqartumi pitsanngorsaanissat suliarai, kisiannili piffissamik eqquisinnaanermut misissukkat inerneri tunngavigalugit paasineqarpoq, inissiiffissamut, anorimut silaannaallu aalaruluttarneranut misissukkat ukiumik ataatsimik sivitsorneqarnissaat pisariaqartinneqartoq. Mittarfik siunissami pitsaanerpaamik sullinneqarsinnaassappat taakku pisariaqarluinnarput. Maanna paasissutissat pigineqartut tunngavigineqassappata, ukiumut ullut 70-it 80-illu missaanni timmisartuussinngitsoortarnissaq naatsorsuutigineqartariaqarpoq. Tamanna itisilerlugu misissuiffigineqartariaqarpoq misissuiffigineqassallunilu, taamaalilluni Kalaallit Airports A/S Qaqortumi suliamik pitsanngorsaanissamut periarfissinneqassammat suliarlu pitsaanerpaamik ingerlassinnaassammagu. Erseqqissaatigineqassaarli Qaqortumi mittarfittaarnissaq timitalerniarlugu Naalakkersuisut pimoorussillutik suliaqarmata.

Mittarfimmut Narsarsuarmut naleqqiullugu annikitsuinnarmik pitsannguiffiusussamut millionerpassuarnik aningaasaliisoqannginnerani piffissamik eqquisinnaanermut pissutsit inissinneqaqqaartussaapput. Kiisalu mittarfimmik atuisussat nutaat pilerisaarneqalerpata piffissamik eqquisinnaaneq taama annikitsigisoq annertuumik ajornartorsiortitsilersinnaavoq, taamaattumillu Kalaallit Airports A/S-ip mittarfimmik pitsanngorsaanissaa inuussutissarsiutinik ingerlataqartut pitsaanerpaamik soqutigisariaqarpaat. Tamanna suliamut kommunimullu pitsaanerpaasussaammat politikeritut akisussaasuusutut akuerisariaqarparput, isumannaannerpaamik kinguaattoorfiunnginnerpaamillu angallassisoqaqqullugu.

Naalakkersuisut sanaartornissamut pilersaarutaat naapertorlugu ukioq 2022-p tungaanut sanaartortoqassaaq. Taamaalilluni sanaartugassanik suliaqartartut amerlavallaanik suliakkersorneqannginnissaat anguneqassaaq, naatsorsuutigineqarporlu taamaaliornikkut aningaasat atugassiissutigineqartut amerlanerulissasut – tamatumalu malitsigisaanik illoqarfinni minnerusuni mittarfiliassat aningaasalersorneqarnissaat aamma periarfissagissaarnerulissalluni.
Tamatuma saniatigut ilisimatitsissutigisinnaavara, Naalakkersuisut ukioq manna Kommune Kujallermi sanaartugassanut neqerooruteqartitsinikkut unammilligassaqarsimammata, tamatumunngalu aamma neqerooruteqartoqannginneranut qaffasippallaamilluunniit neqerooruteqartoqarneranut assersuutinik arlalinnik malitseqarpoq, suliassanik taamaatitsinermik kinguartitsinermilluunniit kinguneqartumik. Tamatumunnga ilaatigut sanaartugassalerinerup annertunera, misilittakkat malillugit suliassaqarfimmi sulisussaaleqinermut attumassuteqarsinnaasoq peqqutaasimassasoq inerniliissutaasinnaasutut oqaatigeqqajaanarsinnaavoq.

Aamma uggorivara Kommune Kujalliup mittarfimmut aqquserniassamut tamatumunngalu atasumik suliffissaqarnissamut tunngatillugu Naalakkersuisut aningaasaliissutaat maluginiarsimanngippagit.

Naggasiutigalugu ilisimatitsissutigisinnaavara, Kalaallit Airports A/S-ip piffissamut pilersaarutip iluarsineqarnissaanut Naalakkersuisut inassuteqaataat Naalakkersuisunit, Inatsisartut Aningaasaqarnermut Akileraartarnermullu Ataatsimiititaliamit kiisalu Inatsisartut Sanaartornermut Ataatsimiititaliaanit akuerineqarsimammat. Mittarfiit pingasut ukioq 2022-mi atulersinneqarnissaannut ulluliussaq tunngavigalugu aningaasaliissutissanut pilersaarut suliarineqarsimavoq. Mittarfiliornissamik pilersaarutit naalakkersuisoqatigiit isumaqatigiissutaat, naalakkersuisoqatigiit aningaasanut inatsisissaq 2018-imoortoq pillugu isumaqatigiissutaat kiisalu Inatsisartut 2015-imi aalajangigaat naapertorlugit naammassineqassapput.

Maanna Kommune Kujalliup mittarfiliassap sananeqarnissaanut qilanaarnera aammalu Naalakkersuisut aalajangiinerannut tapersersuinera ersiutitut tiguara. Qaqortumi mittarfiliornissamut ataatsimoorluta anguniagarput anguniarlugu pilersiviusumik suleqatigiinniarta!

Allakkassinnut ammasumut akissuteqaat aamma tusagassiorfinnut nassiunneqarpoq.

Inussiarnersumik inuulluaqqusillunga

Erik Jensen