Ineqarnermut tapiissutit meeqqanullu tapiissutit pillugit aaqqissuusseqqinneq ilaqutariinnut meerartalinnut pitsaanerusumik atugassaqartitsilissaaq

Ineqarnermut tapiissutit meeqqanullu tapiissutit annertussusissaannik aalajangersaaniarnernut maleruagassat nutaat ukiup nutaap aallartinneranit atuutsilissapput. Allannguineq aningaasarsiakitsut, akunnattumik aningaasarsiallit ilaqutariillu meerartallit aningaasaqarniarnerinut annertuumik pitsanngoriartitsissaaq. Pineqartut ataatsimut 30 millionit koruuninik amerlanerusunik aningaasaliiffigineqarput taakkulu ineqarnermut tapiissutit meeqqanullu tapiissutit naapertuilluarnerusumik naammaginarnerusumillu nalilersorneqartalernissaanut atorneqassapput.

”Allannguinerit ilaqutariit meerartallit aningaaqarniarnerinut malunnaatilimmik pitsanngoriartitsissapput pingaartumik annikitsumik akunnattumillu isertitaqartartunut, meeqqamut tapiissutit ineqarnermullu tapiissutit annertusineqartussaammata. Meeqqanut tapiissutinut ineqarnermullu tapiissutinut maleruagassat pisariaqartinneqaqisumik nutarterneqarnissaat Nalaakkersuisunit annertuumik pingaartinneqarpoq. Ilaqutariit meerartallit suliffissaqarniarnermilu kivitseqataanerorusuttunut inuuniarnikkut pitsaanerusumik atugaqalernissaannut qulakkeerinninnissamut meeqqanut tapiissutit inimullu tapiissutit pillugit malittarisassat allanngortinneqarneri Naalakkersuisut suliaasa ilagaat”, Isumaginnermut Naalakkersuisoq Sara Olsvig oqarpoq

Sulineq imminut akilersinnaasariaqarpoq.
”Aaqqissuusat pineqartut marluusut piffissami sivisuumi isornartorsiorneqartarsimapput aaqqissuussammi soorlu nalunaaqquttamut akunnermusiat annikikkaluartumik 1,5 kr-imik qaffanneqarsimatillugit inuppassuarnut ineqarnermut tapiissutit meeqqanullu tapiissutit annertuumik appartinneqarneqartarput, taamaalilluni akissarsiat qaffariaraluartut ilaqutariit aningaasaataat ikileriartarlutik. Allatut oqaatigalugu ilaqutariit aningaasat atorsinnaasaat ikinnerulersarput. Tamanna naammaginaranilu pissusissamisuunngilaq. Tamatuma kingunerisaanik aaqqissuussat allanngortittariaqalersimapput taamaasiornikkut sulineq imminut akilersinnaasunngortillugu" Isumaginninnermut Naalakkersuisoq Sara Olsvig nangilluni oqarpoq.

Allannguinerit aamma kingunerissavaat ilaqutariinnut meerartalinnut tapiissutit amerlanerit ineqarnermut tapiissutiniit meeqqanut tapiissutinut nuunneqassammata. Matumuuna ilaqutariinnut meerartalinnut tapiisarnerit meeqqanut tapiissutit aqqutigalugit toqqaannartumik meeqqanut tutsinneqassapput, inigisamut attuumassuteqarunnaarlutik. Taamaaliornerup ilaqutariit meerartallit kiffaanngissuseqarnerulersissavaat.

Tamatuma saniatigut meeqqanut tapiissutit aaqqissuussinermi nutaami nutaatut ukiumut akit ineriartornerannut nalimmassarneqartalissaaq taamaaliornikkut meeqqanut tapiissutit nalinga appariartussanngimmat.

Aaqqissuusseqqinnermi ataatsimut isigalugu isertitakitsunut akunnattumillu isertitalinnut ilaqutariinnullu meerartalinnut annertuumik iluarsiineq pineqarpoq.

Maleruagassat nutaat januaarip aallaqqaataani 2018-imi atuutilissapput.

Annertunersumik paasisaqarusuttut Naalakkersuisup allattaa Nina Jul Larsen tlf. 539371 aqqutigalugu attavigisinnaavaat.